Behlül Çetinkaya
20 Август 2021•Ажурирај: 21 Август 2021
ИСТАНБУЛ (АА) - Министерот за надворешни работи на Турција, Мевлут Чавушоглу и неговиот јапонски колега Мотеги Тошимитцу се договорија за почеток на поморски преговори меѓу Јапонија и Турција, пренесува Агенција Анадолија (АА).
Во врска со состанокот Чавушоглу - Мотеги, одржан во Истанбул, дадена е писмена изјава од Јапонската амбасада во Анкара.
За време на состанокот, кој траеше 150 минути, наведено е дека Мотеги го пренел своето жалење за шумските пожари во Турција, а исто така упатил честитки до турските спортисти за успехот на Олимписките игри 2020 во Токио.
Во соопштението се нагласува дека Чавушоглу, на средбата, заблагодарувајќи се за пораките за солидарност, ги изразил своите размислувања за зајакнување на односите со Јапонија.
Мотеги на средбата ги сподели своите размислувања за зајакнување на односите во различни области на соработка, како што е склучувањето на Договорот за економска соработка меѓу Јапонија и Турција, унапредување на преговорите за Договорот за социјална сигурност и формирање на Турско-јапонскиот научен и технолошки универзитет.
„Министерот Мотеги, откако ја претстави работата на Јапонија кон реализација на концептот „Слободен и отворен Индопацифик“ (FOİP), изрази желба да ги продлабочи разговорите меѓу поморските држави Јапонија и Турција за различни поморски прашања. Страните постигнаа консензус за започнување на поморски преговори меѓу Јапонија и Турција“, се нагласува во соопштението од Амбасадата на Јапонија во Анкара.
По повод 100 години од воспоставувањето дипломатски односи меѓу двете земји во 2024 година, планирано е зголемување на меѓусебните посети на високо ниво.
Меѓу другото, во соопштението се наведува дека за време на состанокот Чавушоглу-Мотеги, разменети се мислења за регионални прашања како што се Авганистан, Ирак и Блискоисточниот мировен процес, како и за случувањата во Кина и Северна Кореја.
