Ferdi Bayat
14 Октомври 2023•Ажурирај: 14 Октомври 2023
КАИРО (АА) – Населението на Газа мора да има безбеден и итен пристап до хуманитарна помош, истакнаа турскиот министер за надворешни работи, Хакан Фидан, и египетскиот претседател Абдел Фетах Ел-Сиси на денешната средба, пренесува Анадолу.
Фидан и Ел-Сиси разговараа за најновите случувања во Појасот Газа, соопшти египетското претседателство.
Двајцата официјални претставници „постигнаа консензус за екстремната опасност од сегашната ситуација и нејзината закана за стабилноста и безбедноста на регионот, што бара интензивирање на меѓународните напори за итно ставање крај на насилствата, и враќање на мирот“, се додава.
Тие, исто така, ја истакнаа важноста од спречување на колективното казнување на жителите на Газа, како што се „опсадата, гладта или раселувањето“, нагласи претседателството.
Фидан и Сиси разговараа и за билатералните односи меѓу Туркије и Египет. Египетскиот претседател изрази задоволство од развојот на билатералните односи во рамките на заемната почит и заедничките интереси.
Ел-Сиси го стави фокусот и на важноста да се продолжи со работа за унапредување на односите меѓу двете земји и нивно подигање на ново ниво во иднина, да продолжат меѓусебните чекори за активирање на различни билатерални механизми за соработка и постигнување на конкретен напредок.
Фидан престојува во дводневна официјална посета на Каиро на покана на неговиот египетски колега Самех Шукри.
