АНТАЛИЈА (АА) – Светилникот Гелидоња, кој се наоѓа во округот Кумлуџа во турската област Анталија, им служи како ориентир на морепловците, задржувајќи го своето значајно место меѓу највисоките светилници на турскиот брег, пишува Анадолу.

Светилникот, кој започнал со работа во 1936 година, се наоѓа на 'ртот Ташлик Бурну, на историската Ликиска патека. Познат е како „Светилник Ташлик Бурну“, изграден на 227 метри надморска височина во однос на морското ниво.

До светилникот, кој се наоѓа во рамките на крајбрежниот национален парк „Бејдаглари“, може да се стигне со возило од населбата Караоз, следејќи го патоказот „Светилник Гелидоња /Ликиска патека“, сѐ до делот означен како „Почеток на пешачката патека Ташлик Бурну“.

Оттаму посетителите продолжуваат пешки, движејќи се по патека долга околу два километра, низ шума од црн бор, по што пристигнуваат до историскиот светилник.

За искачување до еден од водечките светилници на Медитеранот, посетителите користат патеки со карактеристична црвеникава почва, кои се јасно видливи во природниот пејзаж.

- Омилена дестинација за љубителите на кампување -

Една од највпечатливите точки на Медитеранот, светилникот Гелидоња е снимен и со дрон, при што од птичја перспектива јасно се забележуваат патеките по кои пешачат посетителите, исцртани врз црвената почва.

Овие природно оформени патишта го прават светилникот Гелидоња маршрута што се вклопува со околниот пејзаж.

Поради природната убавина, историската вредност и локацијата на Ликиската патека, светилникот привлекува голем број домашни и странски туристи, а наедно е честа дестинација за љубителите на природата што кампуваат со шатори.

Денес светилникот ја осветлува патеката за морнарите благодарение на систем за соларна енергија.