Претседателот на турскиот Парламент се состана со претседателот на кипарските Турци

АНКАРА

Претседателот на Големото народно собрание на Република Турција, Мустафа Шентоп, денес се состана со новоизбраниот претседател на Турската Република Северен Кипар (TRNC), Ерсин Татар, кој е во посета на Анкара, јавува Агенција Анадолија (АА).

Според соопштението издадено од Канцеларијата на портпаролот, Шентоп и Татар дискутирале за можната соработка меѓу двете земји.

На состанокот, исто така, учествуваше и амбасадорот на Турската Република Северен Кипар, Кемал Копрулу, по што Шентоп организираше свечен ручек во чест на Татар.

Ерсин Татар, кој претходно беше премиер, на 18 октомври победи на претседателските избори во Турската Република Северен Кипар со 51,74 отсто од гласовите, со што го победи неговиот противник Мустафа Акинџи, кој освои 48,26 отсто.

Татар е петтиот претседател на Турската Република Северен Кипар, и треба да отслужи петгодишен мандат.

Кипар е поделен на два дела од 1974 година, кога кипарските Грци, извршувајќи државен удар, започнаа бран насилства против кипарските Турци, што предизвика реакција од Анкара, која оттогаш е гарант на мирот.

Со децении се појавуваа неколку обиди за решавање на кипарскиот спор, кои завршуваа со неуспех. Последниот, одржан во 2017 година во Швајцарија со учество на земјите гаранти - Турција, Грција и Велика Британија - исто така заврши без напредок.

Турската Република Северен Кипар е основана во 1983 година.