Првата фабрика за авиони во Туркије ќе започне со производство на делови за Ѓокбеј и Хуркуш

ИЗМИР (АА) – Првата фабрика за авиони во Туркије, „ТОМТАШ“ Авиејшн енд Технолоџи Инк.“, наскоро ќе започне со производство на делови за повеќенаменскиот хеликоптер Ѓокбеј и авионите за обука Хуркуш, јавува Анадолу.

„Ќе ја издадеме нашата прва фактура во октомври“, рече Али Екши, член на одборот на ТОМТАШ, за Анадолу на маргините на ТЕХНОФЕСТ, врвен настан за технологија и воздухопловство во Туркије.

„Во рок од неколку недели ќе бидат завршени процесите на сертификација и ќе започнеме со производство на структурните делови на Ѓокбеј и Хуркуш“, додаде Екси.

ТЕХНОФЕСТ, кој беше отворен во средата во турската област Измир, од 2018 година заеднички се организира секоја година од фондацијата Турски технолошки тим (Т3) и Министерството за индустрија и технологија во соработка со други министерства и десетици други јавни институции, приватни компании и универзитети.

Анадолу е меѓу медиумските акционери на ТЕХНОФЕСТ како глобален комуникациски партнер уште од првото издание.

Историјата на ТОМТАШ авијација и технологија датира од 1920-тите години. По формирањето на Турското друштво за авиони во 1925 година беше преземена акција за формирање фабрика за авиони.

Во однос на потребите од капитал и технички персонал беше воспоставено партнерство со германската компанија „Јункерс“.
Официјалното отворање на Тајаре (Авион) и Мотор Турк АС (ТОМТАШ ) се одржа во 1926 година во областа Кајсери во Туркије.

Дел од опремата и персоналот на фабриката беа донесени од Германија.

Фабриката произведе и состави некои делови за авиони патентирани од „Јункерс“.

Партнерството беше прекинато во 1928 година, сепак, поради разликата во платите меѓу германските и турските работници и неисполнувањето на обврските од договорот од страна на германската компанија.

Акциите на „Јункерс“ му беа префрлени на Турското друштво за авиони.

ТОМТАШ повторно беше отворен во 1931 година под името Фабрика за авиони во Кајсери.