АНКАРА (АА) – Првата дама на Турција, Емине Ердоган, денес испрати писмо до првата дама на Соединетите Американски Држави (САД), Меланија Трамп, во кое ја повикува да го прошири сочувството што го покажа за војната во Украина и на хуманитарната ситуација во Газа, јавува Анадолу.

Во своето писмо, Ердоган ја поздрави Трамп со искрена љубов и почит, потсетувајќи на нивната средба во Белата куќа во Вашингтон пред шест години. Таа истакна дека топлиот разговор и љубезното гостопримство што го доживеала за време на заедничката средба остануваат живи во нејзиното сеќавање.

Осврнувајќи се на неодамнешното писмо што Меланија Трамп го испрати до рускиот претседател Владимир Путин во врска со војната во Украина, Ердоган рече дека чувствата изразени во тоа писмо одразуваат совест длабоко поврзана со глобалните прашања.

- „Вашето сочувство за децата без родители во Украина е иницијатива што влева надеж во срцата на луѓето“ -

Ердоган го пофали ставот на Трамп, пишувајќи: „Како што наведовте во вашето писмо, секое дете има универзално и неоспорно право да расте во безбедна и средина на љубов. Ова право не е ексклузивно за еден регион, етничка припадност, религија или идеологија. Поддршката на угнетените на кои им е одземено ова право е фундаментална одговорност кон човечкото семејство“.

„Во овој контекст, особено како сопруга на лидер, вашето сочувство за изгубените животи, разделените семејства и децата што останаа сирачиња под катастрофалните последици од војната во Украина е иницијатива што влева надеж во срцата“, напиша Емине Ердоган.

Таа нагласи дека барањето на Меланија Трамп да ги врати радосните насмевки на украинските деца кои се принудени на тивок смев е „многу значајно“.

„Верувам дека ќе ја покажете оваа важна чувствителност, што ја покажавте за 648-те украински деца кои ги загубија своите животи во војната, уште посилно за Газа, каде што 62.000 невини цивили, од кои 18.000 деца, се брутално убиени во рок од две години“, истакна првата дама на Турција.

- „Кој би помислил дека еден ден ќе го користиме терминот „непознат војник“ за деца?“

Истакнувајќи го огромното насилство во Газа, Ердоган го цитираше Детскиот фонд на ОН (УНИЦЕФ), кој ја опиша Газа како пекол на земјата, над земјата, и гробница за деца под земјата.

„Дали некогаш би помислиле“, праша таа, „дека еден ден терминот „непознат војник“ - некогаш користен за паднати војници чиј идентитет не можеше да се потврди - ќе се користи и за деца?“

„Денес, зборовите „непознато бебе“ напишани на прекривките на илјадници деца од Газа кои немаат никој зад себе и чии имиња не можат дури ни да се идентификуваат, оставаат непоправливи рани на нашата совест“, рече Ердоган.

„Овие деца, доведени во длабока психолошка бездна и откако целосно заборавија како да се смеат, викаат пред микрофони дека сакаат да умрат, носејќи ја исцрпеноста од војната со која не можат да се справат во своите невини срца. Во Газа, историјата бележи дека косата на овие мали деца, сирачиња, побеле од неописливата болка и страв што ги имаат искусено“, додаде таа.

Ердоган нагласи дека прекинатата смеа на децата не е својствена само за Украина, додавајќи: „Испраќањето писмо до израелскиот премиер (Бенџамин) Нетанјаху со повик за ставање крај на хуманитарната криза во Газа би имало огромно значење.“

„Во време кога светот доживува колективно будење, а признавањето на Палестина се претвора во глобална волја, верувам дека вашиот повик за Газа ќе исполни и историска одговорност кон палестинскиот народ“, рече Емине Ердоган.

- „Мора да ги обединиме нашите гласови против овој нарушен глобален систем“ -

Ердоган ја опиша ситуацијата во Палестина не само како геноцид, туку и како манифестација на произволен меѓународен поредок кој ги смета животите на некои за повредни од другите во потрагата по моќ и удобност.

Повикувајќи на солидарност против овој неправеден систем, првата дама на Турција порача: „Мора да ги обединиме нашите гласови и силата против овој искривен поредок кој ги смета животите на некои деца за помалку вредни од другите. Имаме должност да го почитуваме меѓународното право и споделените човечки вредности и цврсто да стоиме околу нашите заеднички принципи.“

„Само тогаш“, додаде таа, „можеме да негуваме надеж за идните генерации кои се доведени до очај пред лицето на оваа бруталност. Само тогаш можеме да зборуваме за враќање на радоста кај децата чија смеа е замолчена и за градење одржлив и траен мир.“

„Како мајка, како жена и како човечко суштество, длабоко ги споделувам емоциите изразени во вашето писмо. Се надевам дека ќе ја негувате истата надеж за децата од Газа, кои копнеат по мир и спокојство“, рече таа.

Емине Ердоган нагласи дека за 18.885 бебиња и деца во Газа кои веќе се изгубени - како шестгодишната Хинд Раџаб, која беше застрелана 335 пати, или тригодишната Рим, која се збогува со нејзиниот дедо со очи полни радост - веќе е предоцна. Но, за над еден милион деца кои преживеаја, сè уште имаме шанса. Времето одамна е дојдено“, додаде таа.