Diyar Güldoğan
20 Јули 2023•Ажурирај: 21 Јули 2023
АНКАРА (АА) - Туркије сè уште работи напорно за да обезбеди продолжување на минатогодишниот историски Договор за жито преку Црно Море, кој истече во понеделникот, соопшти денес Министерството за национална одбрана на земјата, јавува Анадолу.
„Целиот свет му придава големо значење на одржувањето на Договорот за жито. Јасно е дека Договорот, кој беше воспоставен со заеднички напори, игра витална улога во справувањето со глобалната криза со храна“, изјави претставник на Министерството за национална одбрана за новинарите на брифингот во главниот град Анкара.
Русија во понеделникот го прекина учеството во Договорот, кој го потпиша минатиот јули заедно со Туркије, ОН и Украина за обновување на извозот на жито од трите украински пристаништа на Црно Море, кој беше прекинат по почетокот на руско-украинската војна во февруари. Дури и при обновувањето на Договорот во претходните месеци, Москва се пожали дека рускиот дел од Договорот не се спроведува.
„Се надеваме дека оваа Иницијатива ќе продолжи бидејќи во голема мера придонесува за стабилизирање на глобалните цени на храната и докажува дека сите кризи може да се решат со добра волја и дијалог“, рече турскиот претставник.
Истакнувајќи дека Договорот бил продолжен веќе трипати - на 19 ноември, 18 март и 18 мај - официјалниот претставник рече дека повеќе од 33 милиони тони жито биле испорачани од украинските пристаништа во 45 земји на три континенти.
„Нашите контакти со претставници од ОН, Русија и Украина во врска со продолжувањето на Иницијативата за жито, која истече на 17 јули и беше прекината од Русија, продолжуваат во координација со турското Министерство за надворешни работи“, додаде тој.
„Туркије е подготвена да преземе активна и олеснувачка улога за прекин на огнот, воведување траен мир и да обезбеди секаков вид поддршка за ублажување на хуманитарната криза“, рече претставникот на Министерството за национална одбрана.
Запрашан за рускиот персонал во Заедничкиот координативен центар во Истанбул, кој го спроведуваше Договорот, извор од Министерството за национална одбрана, кој сакаше да остане анонимен, рече: „Рускиот персонал го напушти Центарот“, додавајќи дека Туркије се залага за продолжување на Договорот со сегашниот статус.
Во Истанбул беше формиран Заеднички координативен центар со официјални претставници од трите земји и ОН за да ги надгледува пратките.
Туркије, меѓународно пофалена за нејзината единствена улога на посредник меѓу Украина и Русија, постојано ги повикува Киев и Москва да и стават крај на војната преку преговори.
