Erdal Türkoğlu
08 Декември 2015•Ажурирај: 09 Декември 2015
ХАТАЈ (АА) - Подрачјето на и околу планината Туркмен, во северниот дел на Латакија во Сирија, познато и како Бајирбуџак, кое е населено од припадниците на малцинската заедница на Туркмените, од крајот на септември оваа година е средиште на жестоки напади на сириската војска и воздушните напади на руските авиони, јавува Anadolu Agency
Локални туркменски бунтовници ги сузбиваат нападите, а повеќе илјади цивили пребегаа во соседна Турција.
Заедницата на сириски Туркмени во споменатиот регион повторно е во центарот на светското внимание, како поради споменатите напади, така и поради неодамнешниот случај на соборување на рускиот авион кој го повреди турскиот воздушен простор од страна на турската војска, а авионот падна токму во тоа туркменско подрачје.
Станува збор за заедница на етнички Турци кои живеат во регионот на Сирија, Ирак и Иран. Воглавно се концентрирани на северот, на подрачјето на планината Туркмен во Латакија во близина на границата со Турција.
Туркмените се борат против силите на режимот на сирискиот претседател Башар ал-Асад и терористичката организација ДАЕШ, која минатата година е спречена во продирањето на тоа подрачје и натерана на повлекување. Од друга страна, соработуваат со силите на умерената опозиција.
Туркменскиот историчар од Сирија и член на туркменското Собрание, Усаме Солак за АА рече дека регионот кој е населен со Туркмени е од стратешка геополитичка важност бидејќи претстеавува врата на Блискиот Исток кон Западот.
Потсетувајќи дека Туркмените на тоа подрачје се населиле во времето на Селџуците, Солак рече дека во последните два месеца нападите на сириската војска и руските воздушни операции станале посебно опасно место за живеење.
„Туркмените во подрачјето на Бајирбуџак се населени во првите години на Селџуците во 11 век, за да го чуваат патот на аџиите кои патувале на аџилак. Нивното населување е продолжено и во Османлиското царство. Според последниот попис во вкупно 97-те населби во тој регион, живеат околу 241.000 Туркмени.
Регионот Бајирбуџак се дели на два дела и тоа Бајир кој се простира во подрачјето на ридест предел јужно од турскиот град Јајладаги, и Буџак кој го опфаќа крајбрежниот појас на Средоземјето, од планината Џебел Акра до центарот на Латакија.
Солак тврди дека Туркмените во Бајирбуџак не покренале вооружена активност веднаш по избивањето на револуцијата во Сирија во март 2011 година, туку дека вооружените судири во тој регион започнаа една година подоцна.
„Бунтовниците брзо воспоставија контрола во тој регион. Подоцна се повлекоа од едниот дел на територијата. Моментално, дел од територијата т.е Бајир е под контрола на опозицијата, а делот Буџак го контролираат режимските сили. Скоро половина од туркменското население од периферијата на Латакија е протерано од своите домови. Некои избегаа во Турција, а некои во камповите внатре во Сирија“, рече Солак.
Осврнувајќи се и на руските воздушни напади, Солак рече дека постојана мета на руските авиони се сите населени места во туркменскиот регион во Латакија и дека во изминативе два месеца околу 8.000 Туркмени додатно пребегале во Турција.
