Ердоган: Јасна е потребата за заедничко дејствување на меѓународната заедница за решавање на кризата во БиХ

АНКАРА (АА) - Турскиот претседател Реџеп Таип Ердоган изјави дека јасна е потребата меѓународната заедница да дејствува заеднички за надминување на кризата во Босна и Херцеговина, и сите страни да ги избегнуваат потезите кои го загрозуваат суверенитетот и територијалниот интегритет на државата, јавува Агенција Анадолија (АА).

Ердоган во Анкара се сретна со српскиот колега Александар Вучиќ, а потоа на заедничката прес-конференција изрази задоволство и благодарност до делегацијата што дојде од Белград на третото заседавање на Врховниот совет за соработка на Турција и Србија. Делегациите на двете земји потпишаа и четири нови билатерални договори за соработка.

„Нашите односи со Србија се на исклучително ниво, а со почитуваниот колега Вучиќ детално разговарав за односите и соработката меѓу нашите држави, како и за чекорите што ќе ги преземеме во иднина. Разменивме мислења за меѓународни теми, првенствено за регионалните теми и за ситуацијата на Балканот“, рече Ердоган.

Истакнувајќи дека 2021 година била многу плодна во односите помеѓу Турција и Србија, Ердоган потсети дека Турција е првата земја што отвори Генерален конзулат во Нови Пазар и дека е во план годинава да се отвори конзулат и во Ниш, и додаде дека Србија со последните потези во Аланија и Бурса го зголеми бројот на почесни конзули на пет.

Тој рече дека трговската размена меѓу Турција и Србија соборила рекорди и покрај последиците од пандемијата, и додаде дека минатата година е зголемена за речиси 34 отсто на две милијарди, со цел да достигне пет милијарди долари.

Ердоган изрази задоволство од ангажманот на турските компании во развојните проекти во Србија и рече дека моментално во Србија работат повеќе од 1.300 такви компании во кои се вработени близу 8.000 луѓе.

„Нашите вкупни инвестиции во изминатите десет години ги зголемивме од милион долари на 250 милиони долари. Досега ТИКА во Србија има реализирано 323 проекти“, рече Ердоган и додаде дека Турција е подготвена и понатаму на сите инвеститори од Србија да им ги обезбеди сите погодности за работење во земјата.

„Почитувани претставници на медиумите, на состанокот уште еднаш ја потврдивме приврзаноста и цврстите ставови за важноста на мирот и стабилноста на Балканот. Разменивме мислења за политичката криза во Босна и Херцеговина. Поддршката на Србија за суверенитетот и територијалниот интегритет на Босна и Херцеговина е многу, многу важна за мирот и стабилноста во нашиот регион. Јасно е дека е потребно заедничко дејствување на меѓународната заедница за надминување на политичката криза во БиХ. Условот е сите страни да избегнуваат потези со кои се загрозува територијалниот интегритет на Босна и Херцеговина и да се однесуваат одговорно. Турција ќе продолжи да вложува напори за смирување на тензиите на Балканот“, порача Ердоган.

Повторувајќи ја исклучителната важност на прашањето за почитување на суверенитетот и територијалната целосност на Босна и Херцеговина, Ердоган најави дека по изборите во Србија би можело да се одржи трилатерален состанок, вклучувајќи ги и лидерите на Босна и Херцеговина, и тоа во Белград или во Истанбул.

Коментирајќи ги тековните работи на проектот за изградба на автопатот Сараево-Белград, Ердоган рече дека тој заеднички проект би можел да се реализира многу поефикасно и побрзо ако се остават настрана некои разлики и нијанси поврзани со рутата, и додаде дека и тоа ќе биде тема на иднината трилатерална средба.

„Со претседателот на Србија, Вучиќ, одлучивме да ги собереме тројцата лидери – на Бошњаците, Хрватите и Србите, и да постигнеме успех. Дојдовме до оваа одлука“, рече Ердоган.

На прашање на новинарите да ги коментира односите меѓу Турција и Израел, Ердоган рече дека имал разговори со израелскиот претседател Исак Херцог и дека е можна посета на Херцог на Анкара.

Турскиот претседател нагласи дека Турција се залага за афирмативен пристап и заеднички интерес кога станува збор за евентуална соработка со Израел во Источниот Медитеран.