Ердоган: „Турција гледа во иднината со надеж благодарение на младите луѓе во земјата“

ИСТАНБУЛ (АА) - Турскиот претседател Реџеп Таип Ердоган изјави дека Турција кон иднината гледа со надеж преку силата на нејзините млади луѓе во ера кога населението на Западот старее, а проблемите со образованието и инфраструктурата на Истокот упорно остануваат, јавува Агенција Анадолија (АА).

Во видеопораката до Самитот на претприемачите во градот Конија во централна Анадолија, Турција, Ердоган истакна дека претприемништвото е вродена карактеристика на турската нација и дека секој може да биде високопродуктивен во претприемништвото и иновациите кога ќе му се даде можност.

„Во ерата на радикални промени во глобалниот менаџмент и економски систем, претприемништвото носи важни можности“, додаде тој.

„Работиме на искористување на овие можности со постигнување на нашите цели до 2023 година за нашата демократија и развојна инфраструктура што ги донесовме во земјата во изминатите 19 години, а потоа реализирање на нашата визија за 2053 година“, рече Ердоган, осврнувајќи се на речиси дведецениското владеење на Партијата за правда и развој (АК Партија).

Во врска со новата визија на Турција за зелен развој, турскиот претседател рече дека за многуте важни задачи се одговорни сите, од јавниот до приватниот сектор.

„Верувам дека овој самит ќе доведе до иновативни резултати за сите нас во процес во кој глобалните производствени и логистички центри ќе се обноват и економијата заснована на дигитализација и технологија почнува да се зајакнува“, објасни тој.

Дводневниот Самит започна денеска под покровителство на турското Претседателство.