Mümin Altaş
28 Октомври 2021•Ажурирај: 29 Октомври 2021
АНКАРА (АА) - Турскиот претседател Реџеп Таип Ердоган изјави дека Турција придава големо значење на заштитата на животната средина и спроведување на целите на тоа поле, јавува Агенција Анадолија (АА).
„Анкара ќе биде локомотива на Револуцијата за зелен развој, која ја идентификувавме како прва и најамбициозна цел на нашата визија за 2053 година“, рече Ердоган во обраќањето на церемонијата на отворањето на Националниот парк во Анкара, главниот град на Турција.
Турција во 2053 година ќе ја прослави 600-годишнината од освојувањето на Истанбул.
Ердоган посочи дека овој национален парк ќе му даде дополнителна вредност на централниот дел на Анкара и дека секако ќе придонесе за заштита на природата и животната средина.
Турскиот претседател потсети дека Турција во изминатите две децении постигнала голем напредок во многу области.
„Затоа, Турција повеќе не е старата Турција во која некои би можеле да цртаат насоки и да покажуваат со прст како што сакаат“, рече Ердоган.
Тој нагласи дека Турција во минатото реализирала голем број проекти насочени кон заштита на животната средина.
„Исто така, за еколошките проекти ќе ги искористиме 3,15 милијарди долари што ги обезбедивме за Турција преку Светската банка и развиените земји“, рече турскиот претседател.
Ердоган вчера изјави дека е потпишан Меморандум за разбирање, според кој Турција добива 3,15 милијарди долари од Зелениот климатски фонд.
Зелениот климатски фонд (GCF) е фонд основан во рамките на Рамковната конвенција на Обединетите нации за климатски промени (UNFCCC) како оперативна програма на Финансискиот механизам за да им помогне на земјите во развој во приспособувањето и ублажувањето на практиките за борба против климатските промени.
„Штом успешно ќе го поминеме тестот во 2023 година, веќе нема да знаеме за никаква минлива моќ или пречка што може да ја запре Турција“, рече Ердоган.
Турција во 2023 година ја одбележува 100-годишнината од основањето на Републиката.
Националниот парк во Анкара содржи зелени површини, спортски терени, детски игралишта, кино на отворено, базен, велосипедска патека и многу други содржини. Исто така, во рамките на паркот има повеќенаменски Културен центар со конференциска сала со капацитет од 5.000 луѓе, како и џамија, уметнички работилници, ресторан и здравствен дом.
