Ердоган: Нема разлика меѓу постапките на Хитлер и израелскиот премиер Нетанјаху

АНКАРА (АА) - Нема разлика меѓу она што израелскиот премиер Бенјамин Нетанјаху го прави во повеќемесечните напади врз Газа и она што го направи нацистичкиот лидер Адолф Хитлер пред неколку децении, изјави денес турскиот претседател Реџеп Таип Ердоган, јавува Анадолу.

На церемонијата за доделување награди од областа на науката во главниот град Анкара, Ердоган праша: „По што вие [Нетанјаху] се разликувате од Хитлер? Овие [постапки] ќе нѐ натераат да го бараме и Хитлер. Има ли нешто што Нетанјаху го прави помалку од Хитлер? Нема.“

Исто како и пред 80 години во нацистичка Германија, Ердоган рече дека денес научниците низ светот што имаат храброст да ги осудат угнетувањето и прогонот во Газа се соочуваат со притисок и закани, мислејќи на научната фела во Соединетите Американски Држави и на други места, кои се отпуштени или цензурирани затоа што се на страната на Палестинците.

За научниците што се соочуваат со притисок за одбраната на човечкото достоинство во Газа, вратите на турските универзитети се отворени за нив, нагласи турскиот претседател.

„Сфативме дека институциите што се фалат и трошат големи буџети целосно се неискрени кога станува збор за Израел и неговите злосторства“, рече Ердоган.

„Од Советот за безбедност на Обединетите нации до организациите за печат, од ЕУ до новинарските групи, сите институции што служат како апостоли на демократијата не успеаја [во врска со израелските напади врз Газа]“, рече тој.

Не само меѓународните организации, туку и престижните западни универзитети потфрлија по прашањето на Газа, нагласи Ердоган.

Израел започна голема воена кампања врз Појасот Газа по прекуграничниот напад на палестинската група на отпорот, Хамас, на 7 октомври, во која, според здравствените власти во Газа, досега се загинати најмалку 21.110 Палестинци, главно, жени и деца, а повредени се 55.243.

Израелските напади ја оставија Газа во урнатини, со 60 отсто од инфраструктурата на енклавата оштетена или уништена и речиси 2 милиона луѓе раселени поради сериозниот недостиг на храна, чиста вода и лекови.