АНКАРА
Турскиот претседател Реџеп Таип Ердоган денеска изјави дека поради тоа што природата страда од ефектите на индустријализацијата и технолошкиот напредок, треба да се преземат навремени и соодветни активности за да се спречат еколошките проблеми, јавува Агенција Анадолија (АА).
„Индустријализацијата, технолошкиот напредок и последиците предизвикани од човековата активност, за жал, оставаат значително уништување на животната средина. Секоја година последиците од ова уништување се зголемуваат и ги чувствуваме. Доколку навреме не се преземат соодветни мерки, природните катастрофи, аерозагадувањето, обезбедувањето со храна и вода, губењето на биодиверзитетот ќе достигнат точка од која нема враќање“, предупреди Ердоган за време на неговото обраќање на Форумот за животна средина организиран од Агенција Анадолија во Истанбул.
Еднодневниот форум има за цел да се справи со прашања како што се потребата да се создаде нов медиумски јазик за прашањата поврзани со животната средина и климата, меѓународните новински агенции кои ја подигнуваат глобалната свест, должностите на традиционалните и новите медиуми и стремежот кон еколошката свест.
„Несомнено, како и за секое друго прашање, од клучно значење е земјите кои предизвикуваат поголема штета на животната средина да сносат поголема одговорност и да придонесат повеќе во борбата“, рече Ердоган.
Турскиот претседател рече дека Форумот за животна средина на AА е организиран за да помогне да се најде решение за климатската и еколошката криза.
„Од одговорноста на медиумите во климатската криза до одржливиот развој, од пристапот на медиумите кон природните катастрофи до споделувањето одговорност - секое од овие важни прашања ќе биде сеопфатно дискутирано на овој форум“, додаде тој.
„Форумот ќе биде една од најважните глобални платформи на која темелно ќе се разговара за климатските и еколошките прашања“, изјави Ердоган.
- „Еколошките проблеми се една од главните грижи на Туркије“
Ердоган рече дека Туркије отсекогаш ја сметала борбата против климатските промени и еколошките проблеми како една од нејзините главни грижи и дека во последните две децении преземала чекори за заштита на природата и животната средина и за борба против климатските промени.
„Ние веруваме дека заштитата на животната средина, која е заедничка зона на живеење на сите луѓе, не е услуга, туку одговорност. Иако нашата историска одговорност за емисиите на стакленички гасови е помала од 1 отсто, борбата против климатските и еколошките проблеми е еден од нашите врвни приоритети“, додаде тој.
Туркије ги искористи придобивките од искрените напори во промовирањето на обновливите извори на енергија, управувањето со отпадот, проширувањето на шумите и многу други области.
„Во користењето на обновливите извори на енергија, Туркије неодамна се искачи на петтото место во Европа и на 12-тото место во светот. Тоа го постигнавме со зголемување на уделот на обновливите извори на енергија на 55 отсто од нашата вкупна енергија“, додаде тој.
Туркије, исто така, ги зголеми своите пошумени површини на 23 милиони хектари и стана земја во Европа која најмногу ги прошири своите шуми.
„Нашите напори да воспоставиме 81 милион квадратни метри национални градини во 81 област продолжуваат со несмалено темпо. Додека го дизајниравме првиот домашен автомобил во нашата земја, ТОГГ, како целосно електрично возило, бевме совесни за нашата еколошка одговорност“, рече Ердоган.
Тој додаде дека ратификувањето на Парискиот договор за климата во 2021 година ѝ дава значителен моментум на борбата на Туркије против климатските промени: „Ќе продолжиме да ги преземаме сите неопходни чекори за да ја постигнеме нашата крајна цел за нето нула емисии до 2053 година.“
- „Агенција Анадолија еден од водечките медиуми за климатско новинарство“ -
Поздравувајќи ја АА за организирањето на Форумот, турскиот претседател рече дека медиумите имаат голема одговорност да ја подигнат јавната свест за климатските промени и животната средина и во Туркије и во светот.
„Агенција Анадолија стана еден од водечките медиуми за климатско новинарство не само во нашата земја, туку и во светот, со посветениот оддел „Зелена линија“ што ја основа пред кратко време“, рече Ердоган.
Тој додаде дека AА, гласот на Tуркије во светот повеќе од 100 години, „сега му кажува на целиот свет за климатските промени и животната средина гледајќи го невидливото и слушајќи го нечуеното. Ѝ посакувам успех на Агенција Анадолија во тешката, но почесна задача што ја презеде.“
Ердоган, исто така, им се заблагодари на водечките меѓународни новинари, новински агенции и претставници на меѓународни организации кои со своето учество придонесоа на Форумот.
