Со учество на претседателот на Република Турција, Реџеп Таип Ердоган и претседателот на Руската Федерација, Владимир Путин, во Турција денеска е положен камен-темелник за изградба на третата единица на нуклеарната електрана „Акују“ (NGS), која е една од најголемите инвестиции во таа земја, јавува Агенција Анадолија (АА).
Ердоган во обраќањето преку видеоконференција истакна дека ова е многу важен проект во рамките на изградба на енергетската инфраструктура во Турција.
„Одлуката за вклучување на нуклеарната енергија во националната енергетска инфраструктура претставува стратешки чекор во насока на сигурност на снабдување со енергија. Нуклеарната електрана „Акују“ ќе произведува 35 милијарди киловат-часови електрична енергија годишно, задоволувајќи приближно 10 отсто од нашите потреби. Нуклеарната енергија има посебно место во нашата енергетска политика“, рече Ердоган.
Истакна дека 2023 година, кога Турција ќе ја слави јубилејната стота годишнина од прогласувањето на Републиката, земјата ќе ја воведе меѓу државите со нуклеарна енергија.
„Турција на 100-годишнината од прогласувањето на Републиката ќе ја воведеме во лигата на земјите кои поседуваат нуклеарна енергија. Во нуклеарната електрана „Акују“ поставуваме најнапредни безбедносни системи, и секако, посветуваме внимание сѐ да биде во согласност со стандардите на Меѓународната агенција за атомска енергија“, порача Ердоган.
Тој нагласи дека една од целите на Турција е да произведува енергија која нема да ѝ штети на околината.
„Целта на Турција е енергија без штета за околината, целта ни е преку тој пристап да дојдеме до нуклеарна енергија. Турција во производството на енергија во земјата сака да ја додаде и нуклеарната енергија која развива нулта емисија на јаглерод и која еколошки е прифатлива. Откривањето на 405 милијарди кубни метри резерви природен плин во Црно Море исто така е важен чекор во целта на енергетската независност на Турција“, рече Ердоган.
Истакна дека уделот во обновливата и домашната енергија во инсталирањето на електричната сила во Турција изнесува 63,7 отсто.
„Овде имаме можност да ги видиме резултатите на турско-рускиот дијалог на терен. Одлучни сме да ја продолжиме оваа соработка и во наредниот период“, рече турскиот претседател.
На свечениот почеток на изградба на новата единица на првата турска нуклеарна електрана со посредство на видеоконференција присуствуваа турскиот претседател Ердоган, рускиот претседател Путин, како и ресорни министри и други функционери.
Станува збор за нуклеарна електрана која се гради во местото Бујукецели во областа Гулнар во Мерсин. Властите на Турција и Русија договорот за изградба на таа електрана го потпишаа во мај 2010 година, а камен-темелникот за изградба на првата нејзина единица е положен на 3 април 2018 година.
Камен-темелникот за вториот реактор на електраната беше поставен во април 2020 година.
Бидејќи изградбата на електраната се одвива со полно темпо, во мај минатата година беше поднесено барање за дозвола за градба на четвртата и последна единица, со очекување дека ќе биде добиена оваа година.
Работата на првиот реактор на електраната се очекува да започне во 2023 година, кога земјата ќе ја прославува 100-годишнината од Републиката. Сите останати три реактори ќе започнат со работа до крајот на 2026 година.
Електраната, која ќе има четири реактори на напојување ВВЕР-1200 по завршувањето, ќе има вкупна инсталирана моќност од 4.800 мегавати и ќе има вкупен производствен капацитет од 35 милијарди киловати електрична енергија годишно кога ќе биде целосно пуштена во употреба.
Во проектот се очекува да бидат ангажирани околу 15.000 лица, додека околу 4.000 се очекува да бидат вработени кога електраната ќе започне со работа.
Електраната, која има проценет работен век од 60 години, со продолжување на уште 20, деноноќно ќе произведува енергија без емисии на јаглерод.
Исто така, ќе има водечка улога во намалувањето на зависноста од увезените енергетски ресурси, со планови да задоволи околу 10 отсто од потрошувачката на енергија во земјата.
Изградбата на првата турска нуклеарна централа „Акују“ е проект вреден над 20 милијарди долари.
