Aynur Ekiz
01 Декември 2021•Ажурирај: 02 Декември 2021
АНКАРА (АА) - Турскиот претседател и претседател на владејачката Партија за правда и развој (АК Партија), Реџеп Таип Ердоган, изјави дека Турција никогаш нема својата политичка и економска иднина да ја предаде на марионетите на институциите на глобалното земјоделско туторство, јавува Агенција Анадолија (АА).
Ердоган, во обраќањето во Клубот на пратеници на АК Партијата во Големото народно собрание на Република Турција истакна дека турскиот Парламент подготвува буџет за наредната година и изрази уверување дека тој процес ќе биде завршен во интерес на државата и народот.
„Турција во изминатите 19 години имаше многу динамичен процес во кој се нижеа големи исчекори на демократијата и развојот. Сега се наоѓаме во нова фаза на тој динамичен процес. Водиме политика заснована на раст на инвестициите, вработувањето, производството, и таа политика не дојде тукутака преку ноќ. Сето извршено во изминатите години беа подготовки за тоа“, изјави Ердоган.
Тој рече дека развојот и напредокот што турската администрација ги постигнала во изминатите 19 години изгледале невозможни бидејќи наследила многу неразвиена инфраструктура во сите области.
Ердоган понатаму рече дека сите државници, вклучително и Аднан Мендерес, Тургут Озел, Неџметин Ербак и актуелната Влада, биле изложени на жестоки напади додека се обидувале да ја вратат Турција на нејзините патеки и да им се спротивстават на странските тутори.
Турскиот претседател рече дека целиот свет се соочува со инфлација и додаде дека промените на вредноста на турската лира не се резултат на сегашните економски чекори, туку резултат на постапките на оние кои сакаат да ги блокираат тие чекори.
Ердоган рече и дека државата ќе ги расчисти сметките и ќе ги казни сите оние кои акумулираат стока, со цел да ја злоупотребат промената на вредноста на валутите на пазарот.
Тој рече дека надлежните комисии работат на изготвување измени на регулативата со кои ќе се заострат казните за оние кои вршат насилство врз жените во Турција.
