Ердоган за изјавата на Бајден: „Ако зборувате за геноцид тогаш застанете пред огледало и проценете ја ситуацијата“

АНКАРА (АА) - Турскиот претседател Реџеп Таип Ердоган ги повика Соединетите Американски Држави (САД) и европските земји заеднички да ги отворат архивите за настаните од 1915 година и рече дека американскиот претседател Џо Бајден користел неосновани и нереални изјави, јавува Агенција Анадолија (АА).

Ердоган денес, по состанокот на Кабинетот во Претседателскиот комплекс во Анкара, се осврна на изјавата на американскиот претседател Џо Бајден за настаните од 1915 година.

„Американскиот претседател Бајден употреби неосновани, неправедни и нереални изјави за болните настани пред повеќе од еден век“, рече Ердоган.

Тој истакна дека за ерменските наводи нема конкретни докази ниту пресуди на меѓународните судови.

„Истражувањето на случувањата од историјата и откривањето на вистината треба да им се препушти на историчарите, а не на политичарите. На нашата понуда за формирање на заедничка комисија за историјата која би се занимавала со ерменските наводи сè уште не е одговорено“, рече Ердоган.

Турскиот претседател додаде дека изјавите на Бајден се дадени под притисок на радикалните ерменски кругови и антитурските групи.

„Ако зборувате за геноцид, тогаш застанете пред огледало и проценете ја ситуацијата“, порача Еродган.

Во таа пригода тој ги повика Соединетите Американски Држави и европските земји заеднички да ги отворат архивите за настаните од 1915 година.

„Има многу масовни гробници на Турците масакрирани од Ерменците, но никаде нема да најдете масовни гробници кои им припаѓаат на Ерменците. Османлиското Царство не го протера ерменското население, туку го размести во рамките на нивната земја“, додаде Ердоган.

Тој нагласи дека Америка и европските земји не покажуваат само непријателство кон Турција, туку ја издаваат и науката застанувајќи на страната на заблудите, клеветите и лагите на оние кои бегаат од разговори засновани на историските архивски документи.