АНКАРА
Шефот на Канцеларијата за комуникации на Претседателството на Република Турција, Фахретин Алтун, изјави дека секој расистички напад кој не е целосно разјаснет и за кој не се одговарало, носи со себе нови терористички акти, јавува Агенција Анадолија (АА).
По повод втората годишнина од нападот во Ханау, Канцеларијата за комуникации организираше панел „Потрага по правда за жртвите во Ханау: Терористичка закана на крајната десница во Германија“.
Во видеопораката прикажана како дел од панелот, Алтун потсети дека на 19 февруари 2020 година во германскиот град Ханау беше извршен расистички терористички напад и дека панелот е организиран во спомен на жртвите.
Тој упати зборови на поддршка до сите чии роднини беа убиени во терористичкиот напад во Ханау, но и во другите делови на светот.
„Никогаш нема да ја наведнеме главата пред тероризмот“, рече Алтун.
Тој додаде дека на панелот ќе се разговара за терористичката закана од екстремната десница, што во Германија достигна загрижувачки размери, но и за опасностите што ги претставуваат екстремните десничари.
Алтун рече дека ќе се разговара и за влијанието на медиумите врз односот на општеството кон расизмот, како и за потрагата по правда за жртвите од нападот во Ханау.
Тој нагласи дека целта на панелот не е да ја претстави Германија во лошо светло или да нападне.
„Тука не се застапува ставот дека сите Германци се расисти. Нашата цел, иако веруваме дека разбирањето на постоењето на проблемот е предуслов за негово отстранување, е да го привлечеме вниманието на германското општество кон сериозниот проблем што постои денес“, рече Алтун.
Тој додаде дека сака да го нагласи конструктивниот став ориентиран кон решение.
„Поентата е милиони Турци кои со децении живеат во Германија да не се чувствуваат како потенцијални жртви, туку како рамноправни поединци кои можат да водат живот без страв. Каде и да се, проблемот на секој наш граѓанин е проблем на Република Турција. За да се отстрани проблемот треба да се прифати постоењето на проблемот. Нема лекување без дијагноза“, рече Алтун.
Тој додаде дека е очигледно дека денес некои политичари, јавни функционери, новинари во Германија го негираат постоењето на проблемот со расизмот.
Посочи дека германските власти ги осудуваат расистичките терористички акти и дека се „изненадени“ по нападите врз бегалците, кои се крајно предвидливи.
„Овие изрази на зачуденост, со растот на екстремната десница, може да се сфатат како одбранбен механизам на некои политичари кои се качија во возот на расизмот. На ист начин медиумите додека известуваат за терористичките чинови, напаѓачите белци ги нарекуваат 'луди', а оние кои не се бели 'терористи'“, изјави Алтун.
Тој смета дека „овој тренд, кој не е својствен за Германија, служи за чистење на општеството од гревовите на расизмот и вината ја префрла на грст ментално нестабилни луѓе“.
„Покрај тоа, вреди да се забележи дека медиумите не известуваат за расистичките напади во кои не се пролева крв“, рече Алтун.
Додаде дека напорите на јавните институции во борбата против екстремно десничарскиот терор се недоволни и треба да се нагласи дека правдата не е задоволена кога станува збор за расистички напади.
„Навистина, случаите што ја зајакнуваат перцепцијата дека расистите имаат поддршка во Германија, првенствено предмет на НСУ, го подготвуваат теренот за трагедии како што е Ханау. Секој расистички напад за кој не се одговаралои не е целосно разјаснет носи со себе нови терористички акти“, изјави Алтун.
Тој додаде дека еден од најголемите проблеми денес е тоа што расизмот и дискриминацијата се легитимизираат и нормализираат под називот слобода на говорот.
Смета дека говорот на омраза најмногу се игнорира во политичките дебати и во медиумите во Германија, кои се однесуваат особено на бегалците.
Алтун рече дека сегашната ситуација покажува дека Германија станува место каде што муслиманите се систематски криминализирани, а исламот се третира како закана за домашната безбедност.
„Расистичките чувства кон малцинствата, пред сè Турците, понекогаш се изразуваат во јавноста преку употреба на хумор. Јасно сакам да кажам дека нападите и навредите кон личноста на нашиот претседател упатени кон европските земји, вклучително и Германија, се израз на прикриен расизам“, рече Алтун.
Додаде дека овие напади и навреди се одраз на обидите да се пресметаат преку Република Турција, нејзиниот претседател и Турците, кои даваат значаен придонес за германското општество.
Тој смета дека е невозможно да не се мисли дека на нишан се и турските институции и организации кои му служат на турскиот народ и ги штитат неговите права.
Алтун рече дека двојните стандарди се да се остави Република Турција сама да се бори против терористичките организации и да им се дозволи на овие структури да собираат пари во Европа и да регрутираат нови членови.
„Нема друг израз за напорите што Европската Унија (ЕУ) ги вложува да ја оправда ПКК, која е на листата на терористички организации и предавничката мрежа, терористичката организација ФЕТО, која на 15 јули ги покри улиците со крв, како опозициска група“, рече Алтун.
Тој рече дека нема да дозволи да се нормализира расизмот, да се одвои турската заедница од нејзините корени или да се легитимира расизмот под изговор за врските меѓу Турците што живеат во Германија и Турција.
„Ние ќе продолжиме да даваме најголема поддршка од сите поединци и институции кои вистински се борат против заканата од расизмот и екстремната десница. Решени сме да продолжиме тесно да соработуваме со новата германска Влада, невладините организации и медиумите. Нема да дозволиме ниеден од нашите граѓани да биде жртва, да се врши насилство врз него или да му се закануваат“, рече Алтун.
Рече дека ќе продолжи да ги поддржува своите граѓани каде и да се.
„Нема да дозволиме расизмот да се шири, нормализира и да се крие зад термини како слобода на говор“, рече Алтун.
Истакна дека ќе продолжи да прави напори за да обезбеди Турција да го има заслуженото место како стабилизирачка сила предводена од претседателот Реџеп Таип Ердоган, на меѓународно и на регионално ниво.
Тој посочи и дека ќе остане верен на вредностите, пред сè на правдата, не внимавајќи „кој што ќе каже“, туку да се осврне на она што го бара народот.
Алтун им се заблагодари на сите политичари, функционери, уметници, интелектуалци и медиуми кои решително и искрено се борат против заканата од екстремно десничарскиот тероризам во Германија и додаде дека Република Турција е партнер и поддршка за оние што сакаат да го елиминираат проблемот со расизмот.
