Erdoğan Çağatay Zontur
20 Октомври 2020•Ажурирај: 21 Октомври 2020
АНКАРА (АА) - Агенција Анадолија ја започна својата онлајн програма за обука за новинарство во дипломатијата за медиумските работници низ светот.
Програмата за обука, достапна преку видеоконференција, е организирана во соработка со турската Агенција за соработка и координација (ТИКА) за 56 учесници од 13 земји.
На свеченото започнување на програмата, директорот на Академијата за вести на АА, Џихангир Ишбилир изјави дека класичните медиуми сега се заменети со новите медиуми, а традиционалното новинарство е исто така претворено во специјализирано новинарство.
Истакнувајќи дека програмата за обука е организирана во тој опсег, Ишбилир рече: „Дипломатијата е многу погодно поле за да се биде стручен новинар затоа што е многу широко поле. Важно е за дописникот за дипломатија да прави систематско следење и да се фокусира на одредено поле.“
„Во оваа програма ќе ве поврземе со најистакнатите новинари за дипломатијата на Агенција Анадолија. Ќе проучиме неколку примери на известување за дипломатијата за ова кратко време“, додаде тој.
Говорејќи на церемонијата, Угур Таниели, висок официјален претставник на ТИКА, рече дека над 700 претставници на медиумите во над 40 земји учествувале во бројни програми за обука што ТИКА ги организирала од 2017 година.
Првиот ден од обуката заврши со предавање на дописникот за дипломатија на Агенцијата, Шерифе Четин, на тема „Меѓународно новинарство: ЕУ и НАТО“.
На вториот ден од обуката планирани се предавања за меѓународно новинарство и новинарство за Блискиот Исток од високи вработени лица во Агенцијата.
