Турција го осуди нападот со беспилотни летала врз базата на ОН во Судан, во кој загинаа 6 мировници од Бангладеш

ИСТАНБУЛ (АА) – Турција денес го осуди нападот со беспилотни летала врз базата на Ибединетите нации (ОН) во Судан, во кој загинаа шестмина мировници од Бангладеш, а осуммина беа повредени, јавува Анадолу.

„Им посакуваме милост од Алах на мировниците од Бангладеш што ги загубија животите во овој гнасен напад, а на повредените брзо закрепнување“, се вели во соопштението на турското Министерство за надворешни работи.

Министерството ја нагласи важноста на зачувувањето на единството и територијалниот интегритет на Судан и ја повтори „силната поддршка за напорите насочени кон наоѓање мирно решение за тековните конфликти во земјата“.

Нападот се случи во време кога конфликтот меѓу суданската армија и паравоените Сили за брза поддршка (РСФ) продолжува со несмалена сила. Во борбите од април 2023 година убиени се илјадници, раселени се милиони и се предизвика една од најлошите хуманитарни кризи во светот.

Суданската армија за нападот ги обвини РСФ, но немаше коментар од бунтовничката група.

Мировниците беа дел од Привремените безбедносни сили на ОН за Абјеи (УНИСФА), распоредени во спорниот граничен регион богат со нафта, администриран од Судан и соседната држава Јужен Судан - која прогласи независност во 2011 година - и се во конфликт.

Мандатот на мисијата на УНИСФА беше обновен минатиот месец.