Турскиот претседател Ердоган: Зачувувањето на тешко постигнатиот прекин на огнот во Газа е од клучно значење

АНКАРА (АА) – Зачувувањето на тешко постигнатиот прекин на огнот во Газа, кој неодамна беше постигнат меѓу Израел и палестинската група Хамас, е од клучно значење, изјави денес турскиот претседател Реџеп Таип Ердоган, јавува Анадолу.

Во рамките на официјалната посета на Кувајт, Ердоган се сретна со шеикот Мишал ал-Ахмад ал-Џабер ал-Сабах, емирот на земјата, со кој разговараше за билатералните односи и регионалните и глобалните прашања, се вели во соопштението на Турската дирекција за комуникации.

„Нагласувајќи ја клучната важност на одржувањето на тешко постигнатиот прекин на огнот во Газа, претседателот Ердоган рече дека дводржавното решение е императив за траен мир и го истакна значењето на заедничкиот став на исламскиот свет по ова прашање“, соопштија оттаму.

Во соопштението се додава и дека Ердоган „ја нагласи решителноста на Турција за одржувањето на политичкото единство и територијалниот интегритет на Сирија и изрази желба да продолжи напред заедно со братските арапски држави во градењето ветувачка иднина за сирискиот народ“.

Во врска со билатералните односи, Ердоган рече дека постојната соработка меѓу Турција и Кувајт во областите на инвестициите, енергетиката, трговијата и одбранбената индустрија има стратегиско значење. „Претседателот Ердоган го нагласи потенцијалот за натамошно зајакнување на длабоко вкоренетите билатерални односи“, се наведува во соопштението.

„Претседателот Ердоган изрази благодарност за напорите на Кувајт за унапредување на регионалната стабилност како актуелен претседавач со Советот за заливска соработка и истакна дека Договорот за слободна трговија, кој сè уште е во фаза на преговори меѓу Турција и Советот за заливска соработка, дополнително ќе ги зајакне трговските односи на Турција со братските земји од Персискиот Залив“, се додава во соопштението.