НЕВШЕХИР (АА) - Во познатиот туристички регион Кападокија, во централната турска област Невшехир, по повод 15 Јули – Ден на демократијата и националното единство во Турција, балони на топол воздух полетаа украсени со турски знамиња и пригодни транспаренти, јавува Анадолу.

На локациите за полетување во населеното место Ѓореме на балоните беа поставени турски знамиња и транспаренти.

По качувањето на туристите во кошевите, балоните се издигнаа кон небото и летаа над долините на Кападокија, познати по самовилските оџаци и уникатните карпести формации.

На некои од балоните имаше фотографија од херојот подофицер Омер Халисдемир, заедно со транспарент со порака: „Не заборавивме, нема да дозволиме да се заборави.“

Младинската организација на АК Партија во Невшехир постави постери на дел од балоните со натпис: „Епската приказна ја испиша младината.“

Претседателот на младинската организација на АК Партија во Невшехир, Неджати Јуртбилир, изјави пред новинарите дека 15 јули е впишан во историјата како единствена народна борба, водена по цена на животот.

- За време на обидот за пуч во Турција загинаа 253 лица -

Терористичката организација ФЕТО е одговорна за крвавиот обид за државен удар во Турција ноќта меѓу 15 и 16 јули 2016 година. Станува збор за терористичка мрежа предводена од Фетула Ѓулен, кој со години живееше во Соединетите Американски Држави, а чија екстрадиција Анкара официјално ја побара од САД. Тој почина минатата година.

Припадниците на оваа терористичка организација со години напредуваа во државната служба преку местење испити, при што се инфилтрираа во институциите на државата. Подоцна, во декември 2013 година, приврзаниците на ФЕТО во турското правосудство, преку монтиран процес за наводна корупција, се обидоа да гонат голем број високи функционери.

По неколку години следуваше и крвавиот обид за државен удар изведен од офицери инфилтрирани од ФЕТО во турската армија.

Истрагата за терористичката организација ФЕТО покажа дека станува збор за глобална мрежа што претставува закана не само за Турција туку и за секоја друга земја каде што е активна. Турските власти во повеќе наврати укажаа на оваа закана.

За време на обидот за пуч во Турција загинаа 253 лица, а повеќе од 2.730 беа повредени.