Јужна Кореја, Јапонија и САД се договорија за блиска безбедносна соработка по средбата на Путин и Ким Џонг-ун

АНКАРА (АА) - Јужна Кореја, Јапонија и Соединетите Американски Држави (САД) се договорија за блиска безбедносна соработка преку навремени консултации, откако Русија и Северна Кореја потпишаа нов безбедносен договор оваа недела, објавија денес локалните медиуми, цитирајќи го шефот на јужнокорејската дипломатија, пренесува Анадолу.

Министерот за надворешни работи Чо Тае-јул ги даде коментарите по телефонските разговори со американскиот државен секретар Ентони Блинкен и јапонската министерка за надворешни работи Јоко Камикава, објави новинската агенција Јонхап њуз.

Во средата, Северна Кореја и Русија потпишаа договор за партнерство во Пјонгјанг, ветувајќи дека меѓусебно ќе си пружат воена помош „без одлагање“ доколку некоја од нив биде нападната од трета земја.

Договорот за „сеопфатно стратешко партнерство“ беше потпишан по самитот меѓу лидерите на двете земји, рускиот претседател Владимир Путин и севернокорејскиот лидер Ким Џонг-ун.

„Како одговор на заканите на Северна Кореја, се согласивме да ја зајакнеме силната јужнокорејско-американска алијанса и безбедносна соработка меѓу Југот, САД и Јапонија, тесно соработувајќи за раководење на строгите одговори на меѓународната заедница.

„Мислам дека е значајно што испративме силна порака во тесна соработка преку навремена консултација со пријателските земји САД и Јапонија“, додаде Чо.

Тој ги реализира телефонските разговори од Њујорк, каде престојуваше по повод состанокот на Советот за безбедност на ОН оваа недела за кибербезбедноста. Чо претседаваше со состанокот на Советот бидејќи Јужна Кореја го има ротирачкото претседавање со Советот за безбедност овој месец.