Јордан потврди дека не дозволил прелет на воени авиони во неговиот воздушен простор поради израелските напади врз Иран

АМАН (АА) – Јордан не дозволи ниту еден воен авион од завојуваните страни во регионот да го прелета неговиот воздушен простор, соопшти денес јорданската армија во светло на израелските напади врз Иран, јавува Анадолу.

„На ниту еден воен авион не му е дозволено да мине низ јорданскиот воздушен простор од која било од страните во конфликтот во регионот“, соопшти државната јорданска новинска агенција, цитирајќи воени извори.

Јордан претходно го повтори овој став преку официјални изјави од различни претставници, нагласувајќи дека кралството „нема да биде ничие бојно поле“.

Најмалку двајца ирански војници загинаа синоќа во нападите на израелската армија врз воени објекти како одговор на големиот ирански напад со балистички ракети врз Израел на 1 октомври.

Белата куќа рече дека со нападите на Израел мора да се стави крај на директната размена на оган меѓу двете страни, предупредувајќи го Техеран на последици доколку возврати.

Иранските воени претставници претходно предупредија дека секој напад од Израел ќе биде проследен со „поостар одговор“.