Штајнмаер: Германија со ниту една земја нема толку интензивни пријателски и семејни односи како со Туркије

АНКАРА (АА) – Германскиот претседател Франк-Валтер Штајнмаер изјави дека неговата земја нема толку интензивни пријателски и семејни односи како што е тоа случај со Република Туркије, јавува Анадолу.

За време на неговата неколкудневна посета на Република Туркије, Штајнмаер се сретна и со неговиот турски колега Реџеп Таип Ердоган, а по средбата за новинарите изјави дека Германија и Туркије имаат односи засновани на долга и богата историја и дека му било важно да ја посети Анкара по повод 100-годишнината од основањето на Републиката.

Тој рече дека германско-турските односи не завршуваат само со државна соработка, туку дека важна улога играат и врските меѓу луѓето во двете земји.

„Со ниту една друга земја во светот Германија нема толку интензивни пријателски и семејни односи“, истакна Штајнмаер и потсети дека околу три милиони Турци дошле на работа во Германија по потпишувањето на соодветниот договор во 1961 година.

Штајнмаер понатаму рече дека двете земји треба да продолжат со размената на информации и мислења за случувањата во НАТО, групата Г20, а особено за случувањата на Блискиот Исток.

„Како две земји, незаменливи сме една на друга, си требаме“, порача Штајнмаер.

Осврнувајќи се на најновите случувања во Газа, Штајнмаер рече дека е неопходно да се подобри хуманитарната ситуација во блокираната енклава и да се спречи ширењето на војната во регионот.

„Без политичка перспектива за Палестинците не може да се постигне ниту безбедност за Израел. Таа политичка перспектива може да биде само решението со две држави, мора повторно да преземеме чекори во таа насока“, рече Штајнмаер.