Шефот на италијанската дипломатија: „Турција е земја која најмногу работи за мир во Украина“

РИМ (АА) - Министерот за надворешни работи на Италија, Луиџи ди Мајо, истакна дека Турција е земја која најмногу работи за мир во Украина, пренесува Агенција Анадолија (АА).

Ди Мајо на програма на една радиостаница говореше за војната која Русија ја започна против Украина и за последните случувања.

Тој нагласи дека треба да се работи на забрзување на дипломатијата, и дека дипломатијата е главен елемент во оваа насока.

Шефот на италијанската дипломатија рече дека Европската Унија (ЕУ) треба да иницира една мировна конференција.

„Треба да иницираме мировна конференција пред примирјето. Турција е земја која најмногу работи за мирот. Можеме да разговараме со двете страни“, нагласи тој.

Ди Мајо истакна дека доколку преку санкции не се прекинат финансиските извори на рускиот претседател Владимир Путин, тогаш рускиот лидер ќе продолжи да ја финансира војната и нема да сака да седне на преговарачка маса мислејќи дека ќе извојува победа.