Шведска и Финска ги отфрлија повеќето барања на Турција за екстрадиција на терористи во последните 5 години

АНКАРА (АА) - Шведска и Финска ги отфрлија повеќето барања на Турција за екстрадиција на терористи во последните пет години, според турски извори, прашање што добива поголемо значење додека двете нации се обидуваат да се приклучат на воената алијанса на НАТО заедно со Турција, пренесува Агенција Анадолија (АА).

Турското Министерство за правда, во согласност со судските пресуди, побара од Финска екстрадиција на 12 терористи - половина поврзани со терористичката организација ПКК, а половина со терористичката организација ФЕТО, организацијата што е одговорна за поразениот пуч во 2016 година, велат изворите.

Исто така, во истиот период, од Шведска беше побарано да изврши екстрадиција на 21 терорист, 10 членови на ФЕТО и 11 членови на терористичката организација ПКК.

Сепак, Шведска и Финска, кои ја искажаа својата намера да бараат членство во НАТО, не одговорија позитивно на барањата на Турција – членка на НАТО повеќе од 70 години – за екстрадиција на вкупно 33 терористи.

Од 33 барања во последните пет години, 19 се одбиени, додека за пет други нема одговор.

Во меѓувреме, сè уште е во тек правниот процес по барањата за екстрадиција од страна на Турција за уште девет други терористи – двајца од Финска и седум од Шведска.

Во својата над 35-годишна терористичка кампања против Турција, ПКК, којашто се наоѓа на листата на терористички организации во Турција, САД и ЕУ, е одговорна за смртта на над 40.000 луѓе, вклучувајќи жени, деца и доенчиња. ЈПГ е сириски огранок на ПКК.

Терористичката организација ФЕТО и нејзиниот водач кој живее во САД, Фетула Ѓулен, стојат зад неуспешниот обид за пуч во Турција на 15 јули 2016 година, во кој загинаа 251 лице, а 2.734 беа повредени.

Оваа терористичка организација стои и зад долготрајната кампања за соборување на државниот поредок преку инфилтрирање на своите припадници во турските институции, особено во војската, полицијата и судството.

Со децении, Шведска и Финска заземаа неутрална надворешнополитичка позиција во регионот, но тековната руско-украинска војна што започна на 24 февруари предизвика промена во нивниот пристап, при што и јавноста и повеќето политичари се залагаат за приклучување кон НАТО-алијансата.