Челникот на Хамас и иранскиот министер за надворешни работи разговараа за израелската војна во Газа

ИСТАНБУЛ (АА) - Челникот на Хамас, Исмаил Ханије, разговараше со вршителот на должноста министер за надворешни работи на Иран, Али Багери, во Катар, за начините за ставање крај на израелската војна во Појасот Газа, соопшти денес палестинската група на отпорот, пренесува Анадолу.

На разговорите, кои се одржаа меѓу двете страни синоќа, разгледани се палестинските чекори и напорите да се запре израелскиот напад врз Газа, додаде Хамас во соопштението.

Багери ги разгледа иранските напори за поддршка на Палестинците на меѓународната арена, вклучително и во рамките на Организацијата за исламска соработка, блокот на нови економии БРИКС и Шангајската организација за соработка, се наведува во соопштението.

Индиректните преговори меѓу Израел и Хамас со посредство на САД, Катар и Египет досега не успеаја да постигнат договор за траен прекин на огнот што овозможува размена на заробеници меѓу двете страни.

Непочитувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа, од нападот на Хамас на 7 октомври 2023 година.

Според палестинските здравствени власти, оттогаш во израелските напади во Газа загинати се над 37.400 Палестинци, повеќето жени и деца, а над 85.600 се повредени.

Во текот на осум месеци од почетокот на израелската војна огромни делови од Газа се во урнатини, а постои и блокада за храна, чиста вода и лекови.

Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине својата воена операција во јужниот град Рафа, каде што повеќе од еден милион Палестинци побараа засолниште од војната пред почетокот на копнената офанзива врз градот на 6 мај.