Челникот на руската паравоена група Вагнер се заканува со повлекување од Бахмут поради недостиг на муниција

МОСКВА (АА) - Јевгениј Пригожин, шефот на руската паравоена група Вагнер, денес се закани дека ќе ги повлече своите борци од Бахмут, на истокот на Украина, доколку Министерството за одбрана на Русија не обезбеди уште муниција, јавува Анадолу.

„Официјално се обраќам до началникот на Генералштабот, министерот за одбрана, врховниот командант и народот на Русија. На 10 мај 2023 година ќе мораме да им ги предадеме своите позиции во Бахмут на единиците на Министерството за одбрана и да ги повлечеме единиците Вагнер“, соопшти Пригожин.

Тој додаде дека неговата група можела да го преземе Бахмут под своја контрола до 9 мај, но офанзивата е запрена поради недостаток на муниција.

„Поради недостаток на муниција, нашите загуби експоненцијално растат секој ден“, рече Пригожин.

Тој истакна дека одлучил да ги повлече единиците од Бахмут бидејќи борците на групата Вагнер во недостаток од муниција „се осудени на бесмислена смрт“.

Руските сили со месеци се обидуваат да го заземат Бахмут, транспортен и логистички центар во украинскиот регион Доњецк, кој е дел од индустрискиот регион Донбас.