Nazlı Yüzbaşıoğlu
03 Февруари 2020•Ажурирај: 04 Февруари 2020
ЏЕДА/АНКАРА (АА) - Министерот за надворешни работи на Турција, Мевлут Чавушоглу, истакна дека документот кој го соопшти американскиот претседател Доналд Трамп во врска со Палестина не е мировен план, туку план за анектирање, јавува Агенција Анадолија (АА).
Чавушоглу имаше свое обраќање на состанокот на Организацијата за исламска соработка (ОИС) на ниво на министри за надворешни работи организиран во саудискиот град Џеда.
Тој се осврна на таканаречениот Мировен план на Трамп.
„Документот кој го соопштија САД не е мировен план, туку план за анектирање. Овој план е наметнување кон легализирање на израелската окупација и израелското анектирање во Кудс (Ерусалим) и Западниот Брег“, рече тој.
Според него, овој план не може да создаде основа за преговори меѓу двете страни.
„Овој план е документ за продажба во кој максималистичките барања на Израел се диктираат од страна на САД. Тој има за цел засекогаш да ги држи Палестинците под израелска окупација, и [да ги изложува] на болките кои ги носи оваа окупација. Планот е дизајниран на тој начин да овозможи да бидат реализирани најбесрамните соништа на ционистите и нивните поддржувачи“, додаде Чавушоглу.
Шефот на турската дипломатија рече дека таканаречениот Мировен план на Трамп целосно ги игнорира резолуциите на Советот за безбедност на ОН, на Генералното собрание на ОН, како и тоа дека ја игнорира и Арапската иницијатива за мир која е поддржана од страна на ОИС.
Чавушоглу нагласи дека овој план го оневозможува формирањето на суверена палестинска држава во рамки на границите од 1967 година, ја елиминира визијата за дводржавно решение и го наметнува еднодржавното решение за еден Израел во кој ќе има само Евреи.
„Целта на овој план, всушност е легализирање на апартхејд држава формирана со израелската окупација која продолжува веќе половина век“, рече Чавушоглу, додавајќи дека планот го отвора патот кон анектирањето на сите илегални населени места во Јорданската Долина и Западниот Брег.
Чавушоглу истакна дека треба да се спречи Израел да ги распарчи териториите на Западниот Брег, преку неговото анектирање врз основа на овој план.
Тој го поздрави тоа што Арапската лига го одбила овој план, и рече дека сите земји членки на Арапската лига во оваа насока треба да покажат решителен став против САД.
„Постојат страни кои првин се покажуваат дека ги поддржуваат одлуките кои ги донесовме тука и во другите платформи во врска со нашата заедничка кауза, Палестина, а потоа дејствуваат против овие одлуки. Сакам да знаете дека ниту Бог, ниту уметот, ниту пак ние, нема да ја простиме ваквата беспринципиелност“, додаде тој.
Чавушоглу нагласи дека никогаш нема да отстапат од бранењето на честа, ослободувањето и иднината на Палестинците.
„Треба отворено да ја одбиеме и да ја закопаме во историјата оваа иницијатива која е понижување на векот“, истакна Чавушоглу, нагласувајќи дека никогаш не треба да се отстапи од визијата за формирање независна палестинска држава во рамки на границите од 1967 година, и со главен град Источен Кудс.
Според него, Палестина треба да биде поддржана во ОН и на другите меѓународни платформи, додека, рече тој, треба да се поттикнуваат земјите членки на Европската Унија (ЕУ) во насока на признавање на палестинската држава.
Чавушоглу нагласи дека Турција нема да прифати ниту еден план кој не е прифатен од страна на палестинскиот народ, нагласувајќи дека Турција ќе продолжи да ја поддржува борбата за слобода на братскиот палестински народ.
