Хамас: „Распространетото присуство на коронавирусот во затворите во Израел бара меѓународна интервенција“

ГАЗА (АА) - Движењето Хамас во Газа соопшти дека зголемувањето на стапката на Палестинци заразени со Ковид-19 во израелските затвори бара меѓународна интервенција, јавува Агенција Анадолија (АА).

Портпаролот на Хамас, Хазим Касим, истакна дека заразувањето на Палестинците Хасан Шахаде и Селим Идриз со Ковид-19 во затворите на окупаторските сили е одраз на небрежноста на затворската администрација.

Наведувајќи дека животот на затворениците е во вистинска опасност, Касим рече: „Оваа ситуација бара сериозна интервенција на меѓународните институции.“

Делегацијата на палестинските затвореници поврзана со Палестинската ослободителна организација нагласи дека имаат информации дека палестинските затвореници се заразени со Ковид-19 и дека окупаторските сили не ги презеле потребните мерки за борба против епидемијата во затворите и дека ја спречиле испораката на заштитни материјали и средства за дезинфекција до палестинските затвореници.

Абдунасир Феравне, директор за статистика, кој е во Делегацијата на палестинските затвореници, во изјавата за дописникот на АА рече дека од Израелската управа за затвори добил информации дека во затворите 20 Палестинци се заразени со Ковид-19.

Феравне побара меѓународен медицински тим да го испита здравјето на притворените.