Уште пет палестински новинари убиени во израелските напади во Газа

ГАЗА / ИСТАНБУЛ (АА) – Уште пет палестински новинари се убиени во израелските воздушни напади во Појасот Газа во текот на денешниот ден, изјавија медицински извори, јавува Анадолу.

Тие соопштија дека меѓу жртвите е и жена новинарка, а животите ги загубиле заедно со членовите на нивните семејства во напади врз куќи и шатори за раселени цивили во различни делови на Газа.

Изворите соопштија дека убиени се новинарите Абдул Рахман Ал-Абаадела, Халед Абу Сеиф, Азиз Ал-Хаџар, Ахмед Ал-Зајтани и Нур Кандил.

Со новите жртви, бројот на новинари убиени во израелските напади во Газа од октомври 2023 година се искачи на 222, според владината канцеларија за медиуми во Газа.

Министерството за здравство соопшти рано утрово дека најмалку 153 Палестинци се убиени во интензивираните израелски воздушни напади врз енклавата во последните 24 часа.

Израелската армија спроведува брутална офанзива во Газа од 7 октомври 2023 година, во којашто убиени се над 53.300 Палестинци, повеќето од нив жени и деца.

Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.