ИСТАНБУЛ / БОГОТА (AA) – Аргентина ги суспендираше плановите за преместување на својата амбасада во Израел од Тел Авив во Ерусалим поради неодамнешните тензии меѓу израелскиот премиер Бенјамин Нетанјаху и аргентинскиот претседател Хавиер Милеи, објави израелската телевизија Канал 12, пренесува Анадолу.

Според Канал 12, повикувајќи се на „Тајмс оф Израел“, затегнатите односи се поврзани со плановите на израелската компанија „Навитас петролеум“ да започне офшор сондажа за нафта во близина на Фолкландските Острови, со операции што се предвидени да започнат во 2028 година.

Фолкландските Острови се под британска управа како прекуморска територија, но Аргентина тврди дека има суверенитет над островите, кои ги нарекува Малвински Острови.

Во декември Аргентина ги критикуваше „Навитас“ и британската компанија „Рокхопер експлорејшн“, откако компаниите објавија офшор нафтен проект во вредност од околу 2,1 милијарда долари во близина на островите, кој Буенос Аирес го оцени како нелегитимен.

Аргентинските власти соопштија дека проектот нема нивно одобрение и дека претставува еднострана одлука на Велика Британија.

„Рокхопер“ има забрана за работа во Аргентина од 2013 година, кога нејзините активности беа криминализирани, а „Навитас“ доби слична забрана во 2022 година поради дупчење без дозвола.

Во резолуцијата на Обединетите нации од 1976 година се наведува дека ниту Аргентина ниту Велика Британија не треба да преземаат еднострани дејства во врска со територијата додека траат преговорите за суверенитет.

Израелскиот министер за надворешни работи Гидеон Саар се обидел да ги увери аргентинските власти дека Израел нема никаква вмешаност во операциите на „Навитас“ и дека не ја контролира компанијата, наведува Канал 12.

И покрај тие напори, Канал 12 цитираше извори блиски до Милеи кои велат дека спорот ефикасно го запрел преместувањето на амбасадата, а може да ги им наштети на билатералните односи.

Израелското Министерство за надворешни работи претходно ја опиша Аргентина како еден од најблиските сојузници под водство на Милеи и рече дека двете земји остануваат во близок и континуиран контакт.

Милеи првпат ги објави плановите за преместување на амбасадата од Тел Авив во Ерусалим за време на посетата на Израел во февруари 2024 година и во ноември повтори дека новата мисија треба да биде започната напролет.

Израел се обидува да ги убеди владите да ги преместат своите мисии од Тел Авив во Ерусалим. Доколку Аргентина продолжи со планот, ќе стане деветта земја што го сторила тоа, придружувајќи им се на САД, Гватемала, Хондурас, Парагвај, Фиџи, Самоа, Косово и Папуа Нова Гвинеја.