Уште двајца израелски војници загинаа во копнените напади во Газа, бројот на загинати се искачи на 51

ИСТАНБУЛ (АА) - Израелската Армијa денес соопшти дека уште двајца војници загинале во борбите во северниот дел на Појасот Газа, со што бројот на загинати во тековната копнена офанзива од 27 октомври наваму се искачи на 51, јавува Анадолу.

Во военото соопштение се вели дека двајцата загинати војници служеле во 401-та бригада на оклопниот корпус.

Армијата соопшти дека уште двајца војници биле тешко повредени во судирите во северниот дел на Газа.

Израел соопшти дека најмалку 51 војник се убиени откако Армијата ја прошири својата копнена операција во Појасот Газа на 27 октомври.

Израел започна немилосрдни воздушни и копнени напади врз Појасот Газа по прекуграничниот напад на Хамас на 7 октомври.

Според најновите податоци на палестинските власти, загинати се најмалку 11.500 Палестинци, меѓу кои околу 7.900 жени и деца, а над 29.800 други се повредени.

Илјадници згради, вклучувајќи болници, џамии и цркви, се оштетени или уништени во израелската офанзива.

Бројот на загинати во Израел е 1.200, според официјалните бројки.