УНРВА: Од 7 октомври во Газа убиени се 205 хуманитарни работници

ИСТАНБУЛ (АА) - Агенцијата на Обединетите нации за палестински бегалци (УНРВА) денес објави дека 205 хуманитарни работници се убиени од страна на израелските сили во Газа од 7 октомври досега, јавува Анадолу.

УНРВА соопшти дека тековните израелски напади врз Газа резултираат со „цивилни жртви, раселување на населението и уништување на станбените објекти и јавната инфраструктура“.

„Од 7 октомври вкупниот број убиени колеги во УНРВА е 205“, соопшти Агенцијата.

Таа нагласи дека „до 1,9 милиони луѓе (или девет од десет луѓе) низ Појасот Газа се внатрешно раселени, меѓу кои и луѓе што континуирано се раселуваат (некои и до 10 пати).

Здравствениот систем и понатаму „е едвај функционален, 90 болници и примарни здравствени центри не функционираат“, објави УНРВА.

Оттаму е истакнато дека таа останува „главен актер во здравствениот сектор, обезбедувајќи здравствени услуги во 10 примарни здравствени центри и до 100 мобилни медицински пункта низ Појасот Газа“.

Израел продолжува со разорната воена офанзива врз Појасот Газа по нападот на Хамас на 7 октомври минатата година и покрај резолуцијата на Советот за безбедност на Обединетите нации со која се бара итен прекин на огнот.

Според локалните здравствени власти, оттогаш се убиени речиси 39.700 Палестинци, главно жени и деца, а над 91.700 се повредени.

Повеќе од 10 месеци од почетокот на израелската војна огромни делови од Газа се во урнатини, а постои и блокада за храна, чиста вода и лекови.

Израел е обвинет за геноцид пред Меѓународниот суд на правдата, кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.