УНИЦЕФ: Над 19 милиони деца се внатрешно раселени во 2019 година

АНКАРА (АА) - Околу 19 милиони деца се раселени во рамките на своите држави во 2019 година, се вели новиот извештај на УНИЦЕФ, пренесува Агенција Анадолија (АА).

„На крајот на 2019 година, околу 46 милиони луѓе се внатрешно раселени поради судири и насилства. Над 4 од 10 се деца (или 19 милиони)“, се истакнува во извештајот „Lost at Home“ (Изгубени во татковината).

Во 2019 година регистрирани се речиси 33 милиони нови раселени лица - околу 25 милиони поради природни непогоди и 8,5 милиони заради конфликти и насилство. Од нив 12 милиони се деца.

Западна и Централна Африка, како и Блискиот Исток и Северна Африка, имаат најголем број на внатрешнораселени деца.

„Бројките се највисоки досега“, се вели во извештајот и се нагласува дека „појавата на Ковид-19 се заканува да донесе уште поголеми неприлики и неизвесност во нивните животи“.

Во Извештајот се вели дека пандемијата го влошува животот на внатрешнораселените деца и на нивните семејства бидејќи тие претежно живеат во пренаселени кампови или неформални населби „каде што пристапот до основните средства за хигиена и здравствени услуги е ограничен, и каде одржувањето на физичкото растојание е невозможно“.

УНИЦЕФ упати апел за глобално делување, и ги повика земјите да „понудат безбедни домови, заштита и правичен пристап до услугите за секое внатрешнораселено дете, и да направат видливо влијание во животот на децата.“