Унгарскиот премиер Орбан ги критикуваше санкциите воведени против Русија

„Во моментов, 11.000 санкции против Русија се на сила, но војната продолжува. Обидите да се ослабат Русите се неуспешни...бруталната инфлација и недостигот на енергија предизвикани од санкциите може да ја доведат Европа да падне на колена“

БУДИМПЕШТА (АА) – Премиерот на Унгарија, Виктор Орбан, истакна дека стравува дека во Европа нема да има доволно енергија поради Руско-украинската војна и санкциите воведени кон Русија, јавува Агенција Анадолија (АА).

Орбан рече дека Европската Унија (ЕУ) ја продолжува политиката на санкции против Русија, но дека досега таа била неуспешна.

Наведувајќи дека проблемите може да се зголемат доколку ЕУ не ја промени политиката на санкции, премиерот Орбан нагласи: „Во моментов, 11.000 санкции против Русија се на сила, но војната продолжува. Обидите да се ослабат Русите се неуспешни. Од друга страна, бруталната инфлација и недостигот на енергија предизвикани од санкциите може да ја доведат Европа да падне на колена.“

Орбан нагласи и дека во Унгарија нема да има недостиг на енергија и дека земјата ќе има доволно и природен гас и електрична енергија.