Burç Eruygur
04 Септември 2024•Ажурирај: 05 Септември 2024
ИСТАНБУЛ (АА) - Украинскиот министер за надворешни работи, Дмитро Кулеба, ја предаде својата оставка до Парламентот на земјата, соопшти денес парламентарниот спикер, јавува Анадолу.
Претседателот на Врховната Рада (украинскиот Парламент), Руслан Стефанчук, на Фејсбук сподели фотографија од писмото со оставка, истакнувајќи дека тоа ќе биде разгледано на претстојната пленарна седница.
Ниту Стефанчук ниту Кулеба не ги наведоа причините за оставката.
Еден ден претходно, Стефанчук објави дека добил писма со оставки од други украински министри од причини кои допрва треба да се утврдат, откако Киев ја започна најголемата реконструкција на Владата од почетокот на руско-украинската војна на 24 февруари 2022 година.
Свои писма со оставки до Парламентот вчера доставија и вицепремиерката за европски и евроатлантски интеграции Олха Стефанишина, вицепремиерката и министерка за реинтеграција на привремено окупираните територии Ирина Верешчук, министерот за стратешки индустрии Олександр Камишин, министерот за правда Денис Малиуска и министерот за заштита на животната средина и природните ресурси Руслан Стрилетс.
Украинскиот претседател Владимир Зеленски го отпушти и неговиот заменик-шеф на Кабинетот, Ростислав Шурма, кој беше на функцијата од 2021 година, се вели во декретот објавен на веб-страницата на претседателот.
Кулеба беше министер за надворешни работи на Украина од 2020 година.
За време на утринската програма на локалниот ТВ-канал 1+1 во август минатата година, Кулеба рече дека ќе се повлече од функцијата под два услови - ако претседателот Владимир Зеленски го побара тоа од него или ако треба да влезе во „фундаментална контрадикција во надворешната политика“.
„Есенските лисја паѓаат, гранките почнуваат да се гледаат“, изјави портпаролката на руското Министерство за надворешни работи Марија Захарова за државната новинска агенција ТАСС во врска со оставката на Кулеба.
