Украина: Русија го гранатираше Киев за време на посетата на генералниот секретар на ОН, Гутереш

КИЕВ (АА) - Украинскиот министер за надворешни работи, Дмитро Кулеба, изјави дека последниот руски ракетен напад врз Киев бил за време на посетата на генералниот секретар на ОН, Антонио Гутереш, јавува Агенција Анадолија (АА).

„Русија го нападна Киев за време на посетата на генералниот секретар на ОН, Антонио Гутереш и бугарскиот премиер Кирил Петков на главниот град на Украина. Со ова грозоморно варварство Русија уште еднаш го открива својот однос кон Европа и светот“, напиша Кулеба на Твитер.

Заменик-началникот на Кабинетот на претседателот на Украина, Михаил Подољак, исто така истакна дека Русија истрелала проектили врз градот за време на посетата на Гутереш на Киев.

„Претходниот ден седеше на долга маса во Кремљ, а денеска се слушаат експлозии над неговата глава. Дали е ова разгледница од Москва? Дали Русија сè уште е во Советот за безбедност на ОН?“, рече Подољак.

Ракети беа лансирани синоќа во областа Шевченковски во Киев, главниот град на Украина.

Антон Герашченко, советник на министерот за внатрешни работи на Украина, изјави дека руските ракети ги погодиле зградите во кои живеат цивили.