Убиени повеќе од 34.800 Палестинци во израелските бомбардирања на Појасот Газа

ГАЗА (АА) - Бројот на убиени Палестинци во бомбардирањата на Појасот Газа од страна на Израел, обвинет за геноцид, се зголеми на 34.844, објави денес Министерството за здравство на палестинската енклава, известува Анадолу.

„Во досегашните напади се ранети најмалку 78.404 лица“, соопшти Министерството.

„Во израелските напади во последните 24 часа загинаа 55 лица, а 200 се повредени“, соопшти Министерството за здравство на палестинската енклава.

„Многу луѓе сѐ уште се заробени под урнатините и на патиштата, бидејќи спасувачите тимови не можат да стигнат до нив“, се додава во соопштението.

Израелската Армија во понеделникот нареди евакуација на Палестинците во источна Рафа, потег што нашироко се смета за увертира за израелскиот напад врз градот. Вчера таа ја презеде контролата врз палестинската страна на граничниот премин Рафа на границата со Египет, витален пат за достава на хуманитарна помош на опколената територија.

Рафа е дом на повеќе од 1,5 милиони раселени Палестинци кои избегаа од војната откако Израел започна брутална воена офанзива врз Појасот Газа со неселективно бомбардирање на цивилните населби, училишта, верски објекти и болници по нападот на палестинската група Хамас на 7 октомври.

Речиси седум месеци по почетокот на израелската војна огромни делови од Газа се во урнатини, а 85 отсто од населението на енклавата се внатрешно раселени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.