Турција ги отфрли и ги оцени како неосновани наводите од одлуката на Европскиот парламент за судирот во Сирија

АНКАРА

Министерството за надворешни работи на Република Турција ги отфрли наводите од последната одлука што ја усвои Европскиот парламент во врска со судирите во Сирија и како неосновани ги оцени критиките што во таа одлука ѝ се упатени на Турција, јавува Агенција Анадолија (АА).

Европскиот парламент по повод десеттата годишнина од војната во Сирија усвои одлука во која ѝ упати критики на Турција поради изведувањето операции со кои турските сили ја завршија терористичката окупација на поширокото погранично подрачје на северот на Сирија.

„Ги отфрламе сите наводи што во одлуката на Европскиот парламент се однесуваат на нашата земја, која ги отвори вратите за милиони Сиријци и самата го презеде големиот товар што произлезе од војната во Сирија“, се наведува во реакцијата на Министерството за надворешни работи на Турција.

Истакнувајќи дека Европскиот парламент во одлуката покажал предрасуди и пристап кон Турција што е далеку од чесен, во реакцијата од Анкара се наведува дека Турција врз основа на правото за самоодбрана од Повелбата на Обединетите нации извела операции со кои на северот на Сирија ја завршила терористичката закана по народите на Турција и Сирија.

Нагласувајќи дека турските сили во текот на тие операции ги презеле сите потребни мерки за да се избегнат цивилните жртви, Министерството за надворешни работи на Турција во реакцијата на одлуката на Европскиот парламент понатаму наведува дека со операциите е отстранета заканата од терористите на ДЕАШ и ПКК/ЈПГ, а дека потоа локалните власти на привремената влада на Сирија започнале обнова и овозможиле доброволно и сигурно враќање на повеќе од 420.000 бегалци.

Во реакцијата од Анкара се наведува дека Европскиот парламент би требало да ги критикува терористите на ПКК/ЈПГ и нивните интензивни обиди за нарушување на мирот во регионот, и дека е интересно и тоа што Европскиот парламент никогаш не му придавал важност на фактот дека терористите на ПКК/ЈПГ ги ослободиле заробените терористи на ДЕАШ и дека се обидуваат да ја сменат демографската слика во регионот.

Исто така се наведува дека Турција ќе продолжи решително да се бори против сите облици на тероризмот, а дека паралелно со тоа ќе продолжи да вложува максимални напори во потрагата за политичко решавање на судирите во Сирија.

„Го повикуваме Европскиот парламент, наместо давањето неосновани и неточни изјави, да сфати колку за Европа е важно тоа што во Сирија го направи Турција, која ги чува и границите на НАТО и Европа“, порачаа од Министерството за надворешни работи на Турција.