Gökhan Çeliker
20 Февруари 2025•Ажурирај: 21 Февруари 2025
АНКАРА (АА) - Министерот за надворешни работи на Туркије, Хакан Фидан, изјави дека сеопфатниот мировен процес во врска со руско-украинската војна треба да започне без одлагање со учество и на двете страни, известува Анадолу.
Според информациите добиени од извори од турското МНР, министерот Фидан се обратил на 27-миот состанок на министрите за надворешни работи на МИКТА (Мексико, Индонезија, Јужна Кореја, Туркије, Австралија).
Фидан во своето обраќање рекол дека ситуацијата во Газа и Либан, најновите случувања во Сирија, тековната војна во Украина и ескалацијата на хуманитарните кризи низ светот ја нагласуваат итната потреба за зголемена мултилатерална соработка.
Министерот Фидан упати порака дека Туркије решително ја продолжува посветеноста за „територијалниот интегритет и суверенитет“ на Украина.
Наведувајќи дека Туркије продолжува да ја нагласува потребата од дипломатија за ставање крај на војната, министерот Фидан рече:
„Без одлагање мора да започне сеопфатен мировен процес со учество и на двете страни во војната“.
Фидан подвлече дека Туркије е подготвена да даде целосна поддршка во преговорите за постигнување траен и одржлив мир меѓу двете страни.
- Ситуацијата во Газа
Посочувајќи дека прекинот на огнот во Газа „обезбеди привремено олеснување и испорака на хуманитарна помош“, Фидан рече: „Заедно со ова, тековните ограничувања на Израел за хуманитарниот пристап ги попречуваат напорите за ублажување на кризата во целина“.
Истакнувајќи дека се надева дека ќе биде постигнат прогрес напредувајќи кон втората фаза од прекинот на огнот и дека на крајот ќе бидат преземени конкретни чекори за решението на две држави, министерот Фидан додаде:
„Сите заедно, имаме капацитет да одговориме на хуманитарните потреби во Сирија, Газа и пошироко“.
Осврнувајќи се на зајакнувањето на соработката во рамките на МИКТА, Фидан истакна дека е „трајна“ определбата за продлабочување на билатералните односи со другите членки на МИКТА во рамките на партнерството.
