Трамп ќе се изјасни за невин во случајот за 6 јануари

ВАШИНГТОН (АА) - Поранешниот американски претседател Доналд Трамп синоќа изјави дека ќе се изјасни за невин за обвиненијата во ревидираниот обвинителен акт во кој се товари за блокирање на резултатите од претседателските избори во 2020 година, јавува Анадолу.

„Јас, претседателот Доналд Џ. Трамп, горенаведениот обвинет... со ова се откажувам од моето право да бидам присутен на судењето и ги овластувам моите адвокати за моето изјаснување како невин за секоја точка од ревидираниот обвинителен акт“, рече републиканскиот претседателски кандидат во барањето до Судот.

Минатата недела, американскиот специјален советник Џек Смит поднесе ревидирано обвинение во случајот за мешање на Трамп во изборите, стеснувајќи го опсегот на наводите како одговор на неодамнешната одлука на Врховниот суд за имунитет.

Иако ниту едно од четирите првични обвиненија против Трамп не е отфрлено, ревидираниот обвинителен акт отстранува одредени обвинувања, вклучително и оние поврзани со обидите да се искористи Министерството за правда за да се поддржат лажните тврдења на Трамп за изборна измама, според „Си-ен-ен“.

Тоа се случи откако Врховниот суд минатиот месец му додели на Трамп значителен имунитет од гонење по обвиненијата за субверзија на изборите во врска со нападот врз американскиот Капитол на 6 јануари 2021 година, но не и за чекорите што тој ги презеде како кандидат.

Обвинителите и адвокатите на Трамп се очекува да се појават на суд в четврток на сослушување за да се утврдат следните чекори по одлуката за имунитет на Врховниот суд.