ИСТАНБУЛ (АА) - Тајфунот Буалои однесе најмалку 29 животи, 22 лица се водат како исчезнати во Виетнам, а штетата на земјата е над 300 милиони долари, соопштија официјални лица денес, јавува Анадолу.

Вкупно 139 лица беа повредени како последица на тајфунот, според Одделот за управување со насипи и спречување и контрола на природни катастрофи, кој беше цитиран од дневниот весник „Виетнам њуз“.

Буалои предизвика пробивање на насипи, поплави и лизгање на земјиштето во бројни области.

Вкупно 91 куќа се урнаа или беа однесени од поплавите низ северните и централните области, при што речиси 145.000 куќи беа оштетени, а над 20.000 беа поплавени поради тајфунот. Исто така, беа оштетени и повеќе од 1.076 училишта.

Земјоделството беше исто така погодено, со уништени околу 44.000 хектари обработливи полиња и аквакултури, а убиени беа повеќе од 180.000 грла добиток и живина. Над 60.000 дрвја беа искорнати.

Според првичните проценки, економската штета на тајфунот врз Виетнам изнесува над 8 билиони виетнамски донга (303 милиони долари).

Бурата, исто така, ја прекина струјата на речиси 2,7 милиони домаќинства, од кои 1,4 милиони повторно добија електрична енергија.