Necva Taştan Sevinç
26 Мај 2025•Ажурирај: 27 Мај 2025
ИСТАНБУЛ (АА) – Видеото на кое се гледа како првата дама на Франција, Брижит Макрон, го „турка“ претседателот Емануел Макрон во лице, на излезот од авионот по нивното пристигнување во Виетнам, денес стана вирално и предизвика лавина реакции и шпекулации на интернет, јавува Анадолу.
Според францускиот медиум „Франсинфо“, видеото било снимено од неколку западни меѓународни новински агенции и го прикажува претседателот како излегува од авионот, кога Брижит Макрон, облечена во црвено, одеднаш ги става двете раце на неговото лице.
Макрон веднаш чекори назад, се насмевнува и мавта кон камерите.
Кога Кабинетот на францускиот претседател, Елисејската палата, бил контактиран од „Франсинфо“, првично го негирал видеото велејќи дека е лажно, но подоцна ја потврди неговата автентичност, опишувајќи го моментот како „банална закачка меѓу еден брачен пар“.
Извор близок до претседателот за новинарите изјави: „Тоа беше момент кога претседателот и неговата сопруга се олабавија пред почетокот на патувањето, игриво задевајќи се еден со друг“, додавајќи: „Не требаше многу за да има со што да се хранат теоретичарите на заговор.“
Ниедна друга медиумска куќа, освен „Франсинфо“, досега официјално не ја потврди автентичноста на снимката, но „Ле Паризиен“ објави дека кратко претседателот изгледал изненаден, а потоа се свртил и им мавтал на присутните надвор.
Медиумот „20 минути Вести“ истакна дека снимките брзо се прошириле на социјалните мрежи, особено на профилите што критички се настроени кон Емануел Макрон.
Сцената поттикна многубројни коментари – некои корисници го толкуваа однесувањето како „мала расправија“, други дури и како „удар“, а Елисејската палата останува на ставот дека станува збор за „лесен, и момент на игриво задевање“ меѓу сопружниците.
Во видеото, исто така, се гледа како првата дама одбива да ја прифати раката на Макрон додека заедно слегуваат по скалите на авионот.
Претседателот Макрон пристигна во Ханој синоќа, на почетокот на еднонеделната турнеја низ Југоисточна Азија, со цел зајакнување на економските и дипломатските односи, со планирани посети на Индонезија и Сингапур.
