Судири на промонархистичките групи со полицијата во Непал, 2 загинати, 45 повредени

Две лица загинаа, а 45 се повредени во промонархистичките протести во Непал, поради што властите воведоа полициски час во неколку делови на Катманду, пренесува Анадолу.

Кумар Ачарја, портпарол на непалската полиција, изјави дека десетици згради и возила се запалени, според „Катманду пост“.

Новинарот Суреш Раџак го загубил животот откако демонстрантите запалиле зграда во Тинкуне. Тој ги снимал протестите кога се случил инцидентот, објави весникот.

Сабин Махарџан (29) е застрелан од полицијата за време на протестите и прогласен за мртов во Универзитетската болница „Трибхуван“, според „Хималајан тајмс“.

Властите употребија солзавец, гумени куршуми и боева муниција за да ја растераат толпата, при што беа повредени десетици демонстранти.

На видеата од протестите кои кружат на социјалните мрежи се гледаат судирите меѓу демонстрантите и полицијата, при што демонстрантите вандализираат згради и палат низ улиците.

Властите воведоа полициски час во подрачјето на Банешвар-Тинкуне во Катманду и околните населби.

Премиерот Шарма Оли денес свика итен состанок на Кабинетот поради протестите, според „Катманду пост“.

Повеќевековната монархија беше укината во 2008 година, две години откако тогашниот крал Ѓанендра беше принуден да го напушти своето авторитарно владеење и да воведе демократија по повеќенеделните улични протести во 2006 година.

Оттогаш, Ѓанендра живее како граѓанин без никаква државна моќ или заштита. Тој сѐ уште има одредена поддршка меѓу народот, но мали се шансите да се врати на власт.

Хималајската држава беше прогласена за секуларна во 2007 година со привремен устав.