АНКАРА (АА) – Американски федерален апелационен суд вчера ѝ овозможи на администрацијата на Доналд Трамп да стави крај на заштитата од депортација и да ги укине работните дозволи за над 63.000 мигранти од Никарагва, Хондурас и Непал, пренесува Анадолу.

Со едногласна одлука, група од тројца судии на деветтиот окружен апелационен суд го одобри барањето на Министерството за правда за итна наредба со која ќе ѝ се дозволи на Владата да продолжи со прекинување на привремениот заштитен статус (TPS) за граѓаните на три земји додека трае судската постапка, објави Политико.

Новата пресуда го поништува мислењето на окружната судијка на САД, Трина Томпсон, од минатиот месец дека наредбата на администрацијата за укинување на TPS била мотивирана од расизам.

Апелационата група, составена од судијката Консуело Калахан, именувана од Џорџ В. Буш, судијата Ерик Милер, назначен од Доналд Трамп, и судијата Мајкл Хокинс, именуван од Бил Клинтон, издаде кратка одлука на две страници без детално образложение.

Според временската рамка на Владата, статусот на TPS за Непалците истече на 5 август, а заштитата за жителите на Хондурас и Никарагва треба да заврши на 8 септември, без натамошни судски постапки, објави Политико.

И покрај тоа, сите 63.000 мигранти не се погодени од одлуката веднаш да бидат депортирани бидејќи дел од нив имаат нерешени предмети за азил или постапки за спречување на депортација, кои може да им дозволат привремен престој во САД.

Апелациониот суд, сепак, одби одделно барање на Владата да се стопираат постапките во судницата на судијката Томпсон, иако има сигнали дека администрацијата ќе бара таа да биде отстранета од случајот што продолжува и по новата одлука.