Столтенберг упати сочувство за жртвите во смртоносниот терористички напад во Истанбул

ИСТАНБУЛ (АА) - Генералниот секретар на НАТО, Јенс Столтенберг, изрази сочувство за жртвите од терористичкиот напад во центарот на Истанбул, во кој загинаа шест лица, а 81 беа повредени, јавува Агенција Анадолија (АА).

Обраќајќи се на прес-конференција во Хаг, тој рече: „Моето сочувство оди до сите засегнати и до турскиот народ.“

Турската Влада соопшти дека нападот во неделата на преполната улица Истиклал бил извршен од терористичката организација ПКК/ЈПГ.

Турската полиција ја приведе сторителката на нападот, Ахлам Албашир, Сиријка која го постави експлозивот на најпрометната улица, во рација пред зори, додека десетици други осомничени беа приведени.

Полицијата соопшти дека Албашир признала дека била обучена од терористичката организација ЈПГ/ПКК како оперативец на разузнавањето и дека илегално влегла во Туркије од сириски Африн.

„Нашата проценка е дека наредбата за смртоносниот терористички напад е од Ајн ал Араб во северна Сирија, каде што ПКК/ЈПГ има сириски штаб“, изјави претходно министерот за внатрешни работи на Туркије, Сулејман Сојлу.

Во својата над 35-годишна терористичка кампања против Туркије, ПКК, која се наоѓа на листата на терористички организации на Туркије, САД и ЕУ, е одговорна за смртта на над 40.000 лица, меѓу кои има жени, деца и доенчиња.