Selen Temizer
14 Јуни 2021•Ажурирај: 15 Јуни 2021
БРИСЕЛ
Генералниот секретар на НАТО, Јенс Столтенберг, рече дека најголемата порака што ќе биде дадена на Самитот на НАТО е дека „сѐ додека Алијансата се приспособува на промените, таа ќе остане најуспешниот сојуз во историјата“.
Столтенберг зборуваше на отворањето на Бриселскиот форум, што се одржа на маргините на Самитот на НАТО, што ќе се одржи во белгиската престолнина Брисел.
Оценувајќи го влијанието на промената на администрацијата во САД врз НАТО, Столтенберг рече: „Беше одлично да се види силната и лична посветеност на американскиот претседател Џо Бајден за НАТО. Тој многу добро го познава НАТО и верува во идејата дека Северна Америка и Европа ќе работат заедно во НАТО.“
Столтенберг, во врска со повлекувањето на силите на НАТО од Авганистан, истакна дека „останувањето во земјата носи големи ризици“.
Тој исто така посочи дека тие оставиле зад себе добро обучени и опремени безбедносни сили во Авганистан.
Наведувајќи дека сојузниците треба да го зголемат својот придонес во заедничкиот буџет, Столтенберг истакна дека меѓу целите на НАТО во 2030 година е поголемо обучување на локалните сили и обезбедување стабилност во соседните региони.
„Денес сме тука за да се договориме за амбициозната агенда за иднината“, нагласи Столтенберг и додаде:
„Агендата на НАТО за 2030 година е составена од зајакнување на нашата колективна безбедност, зајакнување на нашата отпорност, заострување на нашиот технолошки праг. За прв пат, НАТО ќе ги признае климатските промени како важно прашање за нашата безбедност. Главната порака на нашата агенда ќе биде сѐ додека НАТО се приспособува на промените, ќе остане најуспешниот сојуз во историјата.“
Подвлекувајќи ја потребата да се води дијалог со Русија, Столтенберг потсети дека американскиот претседател Бајден на 16 јуни ќе се сретне со неговиот руски колега Владимир Путин.
