Столтенберг: НАТО „ќе седне и ќе разговара“ за загриженоста на Туркије

ВАШИНГТОН (АА) - НАТО ќе разговара за загриженоста на Туркије во врска со кандидатурите за членство на Шведска и Финска, изјави генералниот секретар на Алијансата, Јенс Столтенберг, јавува Агенција Анадолија (АА).

„Кога се зголемува загриженоста на сојузникот Туркије, тогаш треба да го направиме она што секогаш го правиме во НАТО, а тоа е да седнеме, да ја решиме таа загриженост и потоа да најдеме заеднички пат напред“, изјави Столтенберг за новинарите во Белата куќа по средбата со американскиот претседател Џо Бајден.

„Токму тоа го правиме сега. Во близок контакт сме со Анкара, со тамошното политичко раководство. Разговарав со претседателот [Реџеп Таип] Ердоган и сме во многу близок контакт со Шведска и Финска“, рече Столтенберг.

Тој ќе свика состанок на високи претставници од трите земји пред Самитот на НАТО на 28 јуни.

Столтенберг додаде дека Туркије треба да се смета за важен сојузник, што, како што рече, „придонесува за безбедноста на многу различни начини“.

Генералниот секретар на НАТО ја нагласи стратешката географска лоцираност на Туркије на границата со Ирак и Сирија и нејзината клучна улога во борбата против терористичката организација ДАЕШ.

Шведска и Финска официјално поднесоа барање за приклучување кон НАТО на 18 мај, одлука поттикната од руската војна против Украина, која започна на 24 февруари.

Но Туркије, долгогодишна членка на Алијансата, изрази приговори за нивните кандидатури за членство, критикувајќи ги земјите дека толерираат, па дури и ги поддржуваат терористичките организации како ПКК/ЈПГ и ФЕТО, која стои зад неуспешниот обид за пуч во Туркије во 2016 година.

Сите барања за членство мора да бидат едногласно прифатени од сите 30 земји членки на Алијансата.