Ahmet Gençtürk
26 Септември 2023•Ажурирај: 27 Септември 2023
АТИНА (АА) – Поранешниот соработник на „Голдман Сакс“ и претприемач во трговската морнарица, Стефанос Каселакис, доцна во неделата дојде до изненадувачка победа и стана лидер на најголемата грчка опозициска партија, левичарската СИРИЗА, јавува Анадолу.
Триесет и петгодишниот Каселакис ја победи поранешната министерка за труд Ефи Ахсиоглу во вториот круг од лидерската трка и собра речиси 57 отсто од гласовите, изјави Јанис Дросос, шеф на Изборната комисија на СИРИЗА.
Со семејни корени од Крит, Каселакис е роден и растел во Атина.
Студирал бизнис и меѓународни односи на Универзитетот во Пенсилванија, САД.
Додека бил студент, волонтирал како дел од персоналот на Џо Бајден, во тоа време сенатор, за претседателските избори во 2008 година.
Во 2009 година работел во Одделот за управување со ризици на инвестициската компанија „Голдман Сакс“.
Подоцна ја основал бродската компанија „СвифтБалк“.
На 29 август оваа година тој ја објави својата кандидатура за претседател на СИРИЗА.
Во првиот круг од внатрепартиските избори на 17 септември, Каселакис беше прв меѓу петтемина кандидати со освоени 44,91 отсто, околу 66.000 гласа.
